GIKOMPIRMA niadtong Lunes sa European Union’s anti-piracy task force nga adunay 18 ka tripolanteng Pinoy ang chemical tanker nga gi hijack sa mga piratang Somali sa southern Red sea.
Matud pa sa taho, ang EU Naval Force Somalia nagkanayon nga gi atake sa mga pirata ang Marshall Islands-flagged MT Motivator sa tamping amihanan sa Bab-Al-Mandeb – ang sigpit nga wanang sa dagat taliwala sa Arabian peninsula ug Horn of Africa niadtong Domingo.
Ang MT Motivator, usa ka chemical products tanker nga nagkarga og lubricants ug adunay gibug-aton nga 13,065 tonilada, matud pa sa NAVFOR.
Ang Department of Foreign Affairs nakadawat sa taho nga hijacking gikan sa Philippine Embassy sa Nairobi.
Matud pa ni Ed Malaya, ang tigpamaba sa DFA nga nakig-coordinate na ang DFA sa tag-iya sa barko ug sa naval authorities sa maong rehiyon alang sa mga lakang aron pagseguro sa kaluwasan ug seguridad sa mga tripolante.
Ang NAVFOR nag monitor usab sa sitwasyon.
Sa talaan sa DFA, kining bag-o pa lang nga hijacking nagdala na ngadto sa 81 ka Pinoy nga nadakpan sa mga pirata: 18 ang sa MT Motivator, 3 sa FV Tai Yuan 227, 19 sa MV Eleni P, 1 sa MV Iceberg I, 19 sa MT Samho Dream, ug 21 sa MV Voc Daisy. (PIA-Bohol)
