BSP: Piso, magpabiling lig-on bisan pa sa US credit rating downgrade

TAGBILARAN CITY, Aug. 9 (PIA) – GISEGURO sa Bangko Sentral ng Pilipinas (BSP) nga magpabiling lig-on sa 42 hangtud 54 nga level ang kantidad sa piso kontra dolyar bisan gipaubos sa Standard and Poor’s sa AA+ rating ang credit rating ng Estados Unidos gikan sa kanhi AAA.

Sa briefing sa Senate Finance committee kalabot sa balaodnon sa 2012 national budget, miingon si BSP Governor Amando Tetanco Jr. nga bisan moubos ang piso, makabarug ra usab kini.

Ang lig-on nga pagsulod sa remittances sa mga Overseas Filipino Worker (OFW), export receipts ug ang igong reserves ang mosuporta sa kalig-on sa piso.

Samtang matud pa usab ni kanhi Budget Secretary Benjamin Diokno, dili angay magpanik ang gobyerno sa gihimo sa Standard and Poor’s nga pagpaubos sa AAA rating sa Estados Unidos sa AA+ nga maoy pinakaubos nila nga rating sukad niadtong tuig 1917.

Dugang pa ni Diokno, lig-on pa gihapon ang ekonomiya ng US kun itandi sa mga nasud sa Europa o bisan sa China.

Bisan pa niini, gitataw ni Diokno nga angay pa gihapon’g mag-andam ang Pilipinas tungod kay siguradong maigo ang nasud kun mohinay ang ekonomiya sa Amerika ug mao kini ang panahon aron mas hingusgan sa kagamhanan ang domestic economy niini. (PIA-Bohol/ecb)