PNoy ug Pres. Obama magpulong sa Indonesia
TAGBILARAN CITY, Bohol, Nov. 10 (PIA)–Adunay panagpulong silang Presidente Benigno “Noynoy” Aquino III ug US President Barack Obama sa 19th Association of South-East Asian Nations (ASEAN) Summit nga ipahigayon sa Indonesia sa Nobyembre 18.
Matud pa ni Department of Foreign Affairs (DFA) Secretary Albert Del Rosario, ang mahitabong bilateral meeting tali nilang PNoy ug Obama adunay kalabotan usab sa gitakdang pagbisita dinhi sa nasud ni US Secretary of State Hillary Clinton alang sa ika-60
nga anibersaryo sa Mutual Defense Treaty tali sa Pilipinas ug Estados Unidos.
Pasabot ni Del Rosario, ang maong “high level meeting” pagmatuod lamang nga lig-on ang alyansa ug strategic partnership sa duha ka nasud.
Gipaabot nga hisgotan nilang PNoy ug Obama ang mga isyu sa maritime security, non- proliferation, disaster mitigation, food security ug edukasyon.
Kini ang mahimong ikaduhang pagkita sa duha ka pangulo.
Una nang nagkita ang duha ka lider niadtong Setyembre, 2010 sa gipahigayon nga ASEAN US Leaders’ Meeting sa New York City. (PIA-Bohol/ecb)
