DA: Ani sa humay ug mais, record breaking
TAGBILARAN CITY, Aug. 11 (PIA) – GIPASIGARBO sa Department of Agriculture (DA) nga record breaking ang ani sa humay ug mais sa unang unom ka buwan ning tuig 2011. Matud pa ni Agriculture Secretary Proceso Alcala, miabot hangtud 7.57 million metric tons ang gi- aning humay nga mas taas og 14.4 percent sa susamang mga buwan niadtong tuig 2010.
Mas taas og 37 percent ang ani sa mais nga niitala sa 3.3 million metric tons karong tuig kun itandi sa 2.4 million metric tons niadtong milabay’ng tuig. Sigun pa kang Alcala, ang pagsaka sa ani tungod sa paglapad sa yutang gitikad gikan 1.8 milyong ektarya niadtong tuig 2010 nga nahimong halos duha ka milyong ektarya nga gitamnan og humay sa nasud karong tuiga.
Kini usab tungod sa mas daghang umahan nga gitikad nga giabot sa irigasyon. Giingong nakatabang usab ang maayong pagkalendaryo sa pagtanum tungod kay naka-ani na ang kadaghanan sa mga mag-uuma sa wala pa niabot ang mga bagyo.
Maayo usab ang presyuhan sa mga produktong agrikultura tungod sa mas gihingusgan’g kampanya batok sa smuggling. (PIA-Bohol/ecb)
