SC: Wala pa gikinahanglan ang TRO batok sa 3 ka EOs ni P-Noy

NAKITA sa Supreme Court nga wala pa gikinahanglan ang TRO sa pag implementar ni Presidente Benigno Aquino III sa una niyang tulo ka executive orders, diin gi kuwestiyon ang legality niini.

Sa niaging semana, ang mga ka alyado ni kanhi Presidente Gloria Macapagal-Arroyo sa kongreso ni hangyo sa Supreme Court sa pag nullify sa Executive Order No. 1 ni Presidente Aquino nga nag-mugna sa Truth Commission nga maoy mohimo’g imbestigasyon sa giingong mga anomaliya sa panahon sa administrasyong Arroyo.

Sa ilang petisyon, sila House Minority Leader Edcel Lagman ug mga representante Rodolfo Albano Jr., Simeon Datumanong ug Orlando Fua Jr. ni ingon nga si Aquino nakalapas sa gahum sa kongreso sa pag mugna sa maong komisyon. Matud pa usab nila nga ang gimugnang komisyon, kinsang komposisyon wala pa nahuman, kinahanglang dili ipadayon tungod kay nag-duplicate ra kini sa gahum sa Ombudsman ug sa Justice Department.

Si Gleoresty Guerra, ang SC Public Information Office assistant chief nagkanayon nga ihatag pa sa korte ang maong petisyon nilang Lagman ug mga kauban niini ngadto sa associate justice nga maoy mo kupot sa kaso. (PIA-Bohol)

Credit Info System lagdaan na ni GMA

LAGDAAN na ni Presidente Gloria Macapagal-Arroyo ang usa ka balaod nga magpasayon sa mga proseso sa transaksayon sa pagnegosyo sa nasud aron kalikayan ang pangurakot ug red tape.

Ang Credit Information System (CIS) ni Sen. Edgardo Angara ug Quezon City Congressman Vincent Crisologo nangandoy nga patas-an ang kalidad sa mga trabahante ug magtukod sa usa ka imprastraktura sa kompyuter nga labawng gikinahanglan sa nga buot magnegosyo dinhi.

Ang balaod magpa-ubos sa risgo kon mamuhunan, magpakunhod sa bili kon mangitag kasayuran sa mga tigpautang lakip na ang interes nga ipasa aron mahibal-an nang daan sa mag tigpanghuwam ug pila ang interes nga ilang kabayran sa ilang huwam.

Hingpit na usab nga kakunhoran ang mga papeles nga rekisitos sa pagpangutang kay mahimo na man nga sa komputer na ang transaksyon ug adto na kini kadung sa Credit Information System nga pangunahan sa Securities and Exchange Commission (SEC) (PIA/rachiu)

Mandu ni PGMA sa kasundalohan: Panalipdan ang matag pulgada nga anaa sa teritoryo sa nasud

GIMANDU ni Presidente Gloria Macapagal Arroyo ngadto sa kasundalohan ug kapolisan sa Mindanao nga panalipdan ang matag pulgada sa teritoryo sa nasud nga gilarawng ilogon sa mga rebeldeng Moro Islamic Liberation Front.

Sa iyang pakigpulong alang sa lipot nga pag-atake sa MILF sa Lanao del Norte, gibugtaw ni Arroyo ang mandu dungan sa pagpaseguro nga ikapahiuli na ang kalinaw ug kaugmaran sa Mindanao.

Matud niya, ang pa-budhi nga pag-atake sa MILF dili lamang supak sa kasabutan sa ceasefire apan hagit usab sa tibuok katawhang nangandoy nga ipatagamtam na ang kalinaw ug kaugmaran sa Mindanao.

Gipasalig usab ni Presidente Arroyo nga panalipdan sa kagamhanan ang matag Pilipino gikan sa bisan kinsa nga bahan nga magsakmit sa kalinaw ug kahusay dili lamang sa Mindanao kon dili lakip na usab sa tibuok nasud. (rachiu/PIA)

Mga sanga sa kagamhanan gitapok sa usa ka konseho

ARON hubaron ang kasagaran gubot nga pamaagi pangagamhanan ilabi na sa pagpatigbabaw sa gahum sa balaod, gilagdaan nila ni Presidente Gloria Macapagal-Arroyo, Senate President Manuel B. Villar, House Speaker Prospero C. Nograles, ug Chief Justice Reynaldo S. Puno sa Malakanyang ang usa ka kasabutan aron magmugna sa Judiciary, Executive, and Legislative Advisory and Consultative Council (JELAC)

Pinaagi sa paglagda sa Memorandum of Agreement (MOA) alang sa katukuran niini, mamugna usab ang usa ka forum diin ang mga representante sa tulo ka sanga sa kagamhanan magsabot sa unsa nga paagi mapatigbabaw ang hagum sa balaod.

Sukip usab sa MOA nga mapa-epektibo gilayon human malagdaan, ang pagtumbok sa mga suliran ug nga hisgutanan lakip na ang hiniusang kasolbaran ug pagpatuman sa mga kasabutan nga nakalakip niini.

Ang JELAC dunay 9 ka sakop. Si PGMA maoy isipon nga chairperson kauban sa Bise Presidente, ang Senate President, House Speaker, ug ang Chief Justice isipon nga mga sakop.

Ang ubang sakop niini mao ang usa ka tinumbok nga sakop sa Kabinete, usa ka Senador, usa ka Kongresista kinsa paga-pilion usab sa ilang mga tagsa-tagsa ka pangulo ug ang Associate Justice sa Korte Suprema nga tudloon sa Chief Justice.

Walay dugang nga sweldo nga madawat ang mga sakop sa JELAC ug magsilbe sila sa ex-oficio nga kapasidad, matud sa mga tinubdan. (rachiu/PIA)