by ace | Oct 26, 2011 | Headlines, National News
TAGBILARAN CITY, Bohol, Oct. 26 (PIA)–Miabot karong adlawa sa nasud si Vietnam President Truong Tan Sang alang sa usa ka state visit. Kini kalabot sa pagsaulog sa ika-35 anibersaryo sa pagkatukod sa bilateral ties tali sa Pilipinas ug Vietnam. Upat ka bilateral agreements ang gipaabot nga pagalagdaan sa pagbisita ni Sang sa nasud. Apil na niini ang action plan on cooperation sa Pilipinas ug Vietnam, tourism plan, memorandum of understanding tali sa armadong pangdagat sa duha ka nasud ug ang paghikyad og komunikasyon tali sa Philippine Coastguard ug Vietnamese Marine Police. Kahinumdoman nga miingon kaniadto si Presidente Benigno “Noynoy” Aquino III nga hisgotan niya ang isyu sa giilogan’g Spratly Islands sa ilang pulong ni Sang. (PIA-Bohol/ecb)
by magnolia_eic | Aug 11, 2011 | Headlines, National News
TAGBILARAN CITY, Aug. 10 (PIA) – KUMPIYANSA si Presidente Benigno “Noynoy” Aquino III nga dili maapektuhan ang mga negosyo sa nasud sa nahitabo karon sa ekonomiya sa Estados Unidos.
Nagtuo si Presidente Aquino nga makabawi ra usab ang patigayon sa stock market sa nasud ug mobalik pagkusog ang piso kontra dolyar nga mihinay human ang credit downgrade sa Standard and Poors (S & P) sa Amerika.
Pasabot sa Presidente, kahibalo usab ang mga trading partners sa nasud nga bintahe ang pagnegosyo sa Pilipinas.
Nauna nang mihinay ang mga international trading market apil na ang Philippine Stock Exchange (PSE) tungod sa paghinay sa major economies sa kalibutan. (PIA-Bohol/ecb)
by magnolia_eic | Mar 31, 2011 | Headlines, National News
IPA-SUSPENDE ni Presidente Benigno “Noynoy” Aquino III ang mga kawani sa Bureau of
Customs (BoC) nga nalambigit sa smuggling ug uban pang ilegal nga binuhatan.
Matud pa sa Presidente nga kinahanglang ipaubos sa preventive suspension ang maong
mga opisyal aron dili maimpluwensyahan niini ang gihimong imbestigasyon sa buhatan.
Tinguha usab niini nga mapakita sa publiko nga seryoso ang kagamhanan sa kampanya niini
batok sa smuggling.
Gihimo sa Presidente ang maong pahayag human madawat ang taho ni Customs
Commissioner Angelito Alvarez diin 12 ka operations officer, examiner ug document
processor ang girekomendang pasakaan og kaso tungod sa pagkalambigit sa smuggling ug
uban pang kaso sa korapsyon. (ecbPIABohol)
by magnolia_eic | Mar 29, 2011 | Headlines, National News
GIKONSEDERA sa Malakanyang nga usa ka ‘wake up call’ ang pagus-us sa satisfaction
ratings ni Presidente Benigno “Noynoy” Aquino III sa pinakaulahing survey sa Social Weather
Station (SWS).
Matud pa ni Presidential Communications Group Secretary Ricky Carandang, gipakita
lamang niini nga gustong makita dayon sa publiko ang resulta sa gidusong reporma sa
administrasyong Aquino.
Gipahayag ni Carandang nga natural lamang ang pagus-us sa ratings human ang eleksyon,
diin kasagarang mo ubos ang numero sa usa ka lider sa mga panahon sama niini.
Nagtuo si Carandang nga daghan gihapon ang misuporta sa Presidente.
Gitumbok pa sa kalihim nga lahi ang isyu sa pagpalit sa Presidente sa mahalong sakyanan.
Sa pinakaulahing SWS survey, mi ubos sa 51 porsyento ang satisfaction ratings sa
Presidente sa buwan sa Marso gikan sa 64 porsyento niadtong Nobyembre sa milabay’ng
tuig. (ecbPIABohol)
by magnolia_eic | Oct 6, 2010 | Headlines, National News
SI Presidente Benigno “Noynoy” Aquino III mismo ang mo atubang sa mga Katolikong obispo sa umaabot nga diyalogo kalabut sa reproductive health, matud pa sa tigpamaba sa Malacañang nga si Edwin Lacierda niadtong Lunes.
Sa usa ka pagpakig-pulong sa mga tigbalita niadtong Lunes sa hapon, si Lacierda miangkon nga nasayop siya sa pagsulti sa usa ka press conference sayo nianang buntaga nga usa ka opisyal nga representante gikan sa gobyerno ang ipadala kon di makatambong ang Presidente alang sa usa ka diyalogo.
Giangkon ni Lacierda nga nasayop siya paghubad sa text message ni Aquino. Matud pa niya nga nahinabi na niya ang Presidente og nipasalig kini nga siya mismo ang motambong sa maong diyalogo tali sa mga obispo.
Si Lacierda nagkanayon nga ang opisyal nga representante sa kagamhanan mao lamang ang mohusay sa maong diyalogo tali sa Presidente ug sa mga Obispo. Apan dugang pa ni Lacierda nga sa pagkakaron, wala pa hinuoy napili nga opisyal nga representante.
Gi klaro usab sa tigpamaba sa Palasyo nga dili tinuod ang gikatahong preliminary meeting tali ni Aquino ug sa mga obispo sa miaging Biyernes. Matud pa ni Lacierda nga si Aquino nakig-bayloay lamang og text messages sa usa ka obispo — apan wala kini hinganli ni Lacierda — diin gipasalig ni Aquino ang katuyuan sa kagamhanan nga makipag-diyalogo. (PIA-Bohol)
