by magnolia_eic | Apr 5, 2011 | Headlines, National News
WALAY plano si Presidente Benigno Aquino III nga magpatuman og ‘economic holiday’ sa
pagsaulog sa Araw ng Kagitingan sa umaabot nga Abril 9.
Sigun sa pamahayag sa Malacañang sa official gazette niini, magpabilin ang pagsaulog sa
Araw ng Kagitingan sa Abril 9 (Sabado).
“To those asking, Araw ng Kagitingan will be observed on April 9, a Saturday,” kalabot sa
nakabutang sa Proclamation 84.
Saulogon ang kaisog sa mga Filipino war veterans nga ni surrender sa Japanese forces
niadtong World War II sa Araw ng Kagitingan sa Dambana ng mga Bayani sa Bataan.
(ecbPIABohol)
by magnolia_eic | Feb 3, 2011 | Headlines, National News
GIPASABUT sa Mala¬cañang sa ikaduhang higayon ngadto sa Catholic Bishops Conference of the Philippines (CBCP) ang Responsible Parenthood nga giduso ni Presidente Benigno Aquino III.
Matud pa ni Presidential Spokesman Edwin Lacierda, gipasabut sa gobyerno sa tinugyanan sa CBCP ang pagduso ni Presidente Aquino sa Responsible Parenthood isip usa sa prayoridad niini sa Kongreso.
Si Sec. Lacierda niingon nga nagkasinabut ang tinugyanan sa gobyerno ug CBCP nga manghatag og impormasyon sa magtiayon kalabut sa family planning.
Dugang pa ni Lacierda, angay nga himuong klaro nga gawasnon ang magtiayon nga mopili sa gusto nilang pamaagi sa family planning ug dili ipugos ang artificial nga pamaagi sama sa condom ug pills.
Tumong usab sa gidusong Responsible Parenthood nga mapakunhod ang kakabus nga kahimtang sa nasud.
Gikatakdang plan¬tsahon usab sa sunod nga pulong sa sunod buwan ang mga probisyon sa gidusong balaud aron mahimong madawat og hangupon kini sa tanan. (ecbPIABohol)
by magnolia_eic | Jan 21, 2011 | Headlines, National News
Gimanduan ni Presidente Benigno Aquino III ang pulisya kagahapon nga maglusad og halapad nga manhunt operations ug lalom nga imbestigasyon sa kaso sa anak ni Atty. Oliver Lozano nga nakit-ang patay sa Pampanga.
Si Aquino niingon nga dili angay maka-ikyas ang utok sa pagpatay sa anak ni Atty. Lozano ug driver niini.
Gidagit ang anak ni Atty. Lozano nga si Edmer, 44 anyos ug driver niining si Ernane Sensil niadtong Miyerkoles samtang padung sa usa ka kliyente. Nakit-an pagka sunod adlaw ang patay’ng lawas sa driver ug ang van samtang ang patay’ng lawas ni Lozano nakit-an sa Mega dike sa Porac, Pampanga niadtong Biyernes. Gisunog pa ang patay’ng lawas sa biktima.
Samtang nagtukod usab si PNP chief Raul Bacalzo og Task Force Lozano aron motutok sa maong kaso. (ecbPIABohol)
by magnolia_eic | Nov 13, 2010 | Announcements, Headlines, National News
GIDEKLARA ni Presidente Benigno Aquino III nga usa ka regular non-working holiday ang
umaabot nga Nobyembre 29 (Lunes) isip pagsaulog sa Bonifacio Day nga natunong og
Martes (Nobyembre 30).
Matud pa ni Deputy Presidential Spokesperson Abigail Valte, nagdesisyon na si Presidente
Aquino nga ibalhin ang pagsaulog sa Bonifacio Day sa Nobyembre 29 imbis nga Nobyembre
30.
Nakabutang sa Proclamation 1841 nga mamahimong ibalhin sa pinaka-duol nga Lunes ang
usa ka holiday.
Ning sayo pa lang, gideklara usab ni P-Noy nga non-working holiday ang Nobyembre 16
tungod sa Eid’l Adha. (PIA)
by magnolia_eic | Oct 21, 2010 | Headlines, National News
GI aprubahan niadtong Lunes sa Senate Committee on Peace Unification and Reconciliation ang resolusyon nga midapig sa gipagawas nga proclamation ni Presidente Benigno Aquino III nga naghatag og amnestiya sa mga sundalo nga nahilambigit sa tulo ka managlahing kudeta niadtong panahon ni kanhi Presidente Gloria Macapagal Arroyo.
Matud pa ni Sen. Teofisto Guingona III, chairman sa komite nga naaprubahan na sa committee level ang maong resolusyon ug kinahanglan na lang dalhon kini sa plenaryo aron botohan sa mga senador.
Sa pagkakaron, naka-recess pa ang Kongreso ug usa sa mga hisgutan sa pagbalik sa sesyon sa Senado karong Nobyembre 8 mao ang gi aprubahang resolusyon mahitungod sa amnesty.
Aron mapatuman ang Proclamation no. 50 sa Presidente, kinahanglang aprubahan kini sa Senado ug Kamara.
Mahinumdoman nga sa niaging semana, gilagdaan ni Presidente Aquino ang Proclamation No. 50 nga nagtinguhang hatagan og amnestiya ang mga 300 ka sundalo nga miapil sa kudeta batok sa administrasyong Arroyo niadtong tuig 2003, 2006, ug 2007. (PIA-Bohol)
Aquino natagbaw sa pagresponde sa kagamhanan sa bagyong ‘Juan’
SI Presidente Benigno Aquino III niadtong Martes nagkanayon nga natagbaw siya sa pagresponde sa kagamhanan sa giingong pinakakusog nga bagyo nga miigo ning tuiga.
Matud pa sa Presidente nga ang accurate ug timely predictions sa PAGASA maoy nakapa-aghat sa ubang ahensya sa kagamhanan sa pagpangandam daan sa kadaut nga dala sa bagyong Juan nga adunay international codename nga Megi.
Si Presidente Aquino niingon pinaagi sa text message nga ang Department of Public Works and Highways, ang Armed Forces ug ang mga local government units nakatubag dayon sa paghapsay sa Maharlika highway.
Wala pa hinuon nakadawat og tahu ang Presidente gikan sa mga gobernador sa mga naapektuhang probinsya kon nagkulang ba ang mga supplies sa pagkaon ug uban pang relief items. Apan nagtuo ang Pangulo nga igo ra ang mga pagkaon ug uban pang relief items nga gipang-andam sa mga local government units ug sa Department of Social Welfare and Development sa mga evacuation centers.
Dugang pa ni Aquino nga dili pa matino sa nasudnong kagamhanan ang gidak-on sa kadaut nga gibilin sa bagyong Juan sa Isabela ug Cagayan.
Dugang usab sa Presidente nga ang mga power supply sa mga naapektuhang lugar ibalik dayon human sa pag inspeksyon sa tanang power lines. (PIA-Bohol)
