CGMA, gibutang na sa Immigration watchlist

TAGBILARAN CITY, Aug. 10 (PIA) – GIBUTANG na sa watchlist order sa Bureau of Immigration (BI) si kanhi presidente ug karon Congresswoman Gloria Macapagal-Arroyo.  Sa duha ka pahinang kamanduan nga gilagdaan ni Justice Secretary Leila de Lima, molanat og 60 ka
adlaw ang maong watchlist order.

Gipagawas ang watchlist order tungod na usab sa tulo ka kasong plunder nga gipasaka batok sa kanhi presidente.

Matud pa ni Justice Secretary Leila de Lima nga dugay na unta’ng may order apan gipalabay lamang una kini tungod sa “humanitarian reasons” human gipaubos sa cervical spine surgery si Ginang Arroyo.

Gitataw usab ni de Lima nga ang watchlist order paniguro lamang nga dili basta makagawas sa nasud ang usa ka tawo kun walay pagtugot gikan sa DOJ.

Una nang gibutang usab sa Immigration watchlist ang asawa ni Ginang Arroyo nga si Mike human gi-request sa Senado taliwala sa paglambigit sa pangan niini sa pagbaligya og segunda-manong helikopter sa PNP. (PIA-Bohol/ecb)