C-130 gamiton sa AFP sa pagbakwit sa mga Pinoy sa Libya

ANDAM na ang Armed Forces of the Philippines (AFP) aron gamiton ang C-130 plane niini
alang sa pagbakwit sa may 200 ka overseas Filipino workers (OFWs) nga napiit karon sa
kagubot sa Libya.

Matud pa ni AFP Spokesman Brig. Gen. Jose Mabanta Jr., gihuwat na lamang sa Philippine
Air Force (PAF) ang go signal gikan sa Malacañang ug uban pang hingtungdan nga ahensya
sa kagamhanan aron mobiya na sa Libya ug i-rescue ang mga Pinoy didto.

Niingon si Mabanta nga 150 ka pasahero ang kapasidad sa usa ka C130 plane kun wala kini
bagahe ug kung adunay mga dala ang mga OFW’s, naa sa 100 ang mahimong mosakay sa
maong eroplano.

Naka-standby na ang C130 alang sa maong mis-yon. (ecbPIABohol)

6 nga Pinoy sa Kabul plane crash nailhan na

NATINO na sa Embahada sa Pilipinas ang unom ka Pinoy nga namatay sa nahagsa nga C-130 cargo plane sa Kabul, Afghanistan niadtong Martes.

Mao kini silang pilot Henry Bulos, co-pilot Rene Badilla, mga crew nga sila Nilo Medina ug Ibelo Valbuena. Duha pa ka Pinoy nga nailhan lamang sa mga pangan nga Mr. Castillo, mekaniko ug Mr. Padora, usa ka avionic.

Ang maong cargo plane nga nahagsa gipanag-iya sa Trans Afrique sa Ghana ug gi kontrata kini sa US firm National Air Cargo. Gikan ang cargo plane sa Bagram Air Base og paingon kini sa Kabul Airport sa dihang nahagsa duol sa Kabul.

Matud pa ni Ed Malaya, ang tigpamaba sa Department of Foreign Affairs (DFA) nga ‘undocumented’ ang 6 ka Pinoy ug nagpasabut nga illegal silang nitikang sa Afghanistan tungod kay aduna may ‘existing ban’ sa mga overseas Filipino workers sa Iraq ug Afghanistan.

Gitahasan na sa DFA-Office of the Undersecretary for Migrant Workers Affairs ang Embahada sa paghatag og tabang ug makipag-koordinasyon sa mga awtoridad ug employer sa mga biktima alang sa daling repatriation sa ilang mga patay’ng lawas ug sa paghatag og mga benepisyo alang sa ilang pamilya. (PIA-Bohol)