Tawong dunay kaso dakpan didto sa Carmen

NASIKOP sa kapulisan ang usa ka tawo nga dunay giatubang nga kaso sa hukmanan sa nataran sa korte didto sa lungsod sa Carmen.

Suspetsado nailhan nga si Dodie Tagaamo, 40, ulitawo, taga-barangay Vallehermoso sa maong lungsod.

Matud sa taho nga ang suspetsado gidakop sa mga sakop sa Carmen Police Station pinangoluhan ni SPO2 Delio Elumbaring mga alas 11 sa buntag niadtong Huwebes didto sa nataran sa 16th Municipal Circuit Trial Court sa Carmen-Batuan nga nakabase sa naasoy nga lungsod pinasikad sa orden de aresto nga giisyo ni Maghuhukom Samuel Amila Biliran sa nahisgutang korte gumikan sa kasong pagbinastos.

Nagakawagas ang maong akusado human nakabayad og piyansa nga mokabat ngadto sa P3,000. (Andy Nalzaro)

Ulitawo giluba sud sa usa ka diskohan, kritikal

GRABENG hingsamdan ang usa ka ulitawo human gidunggab sa usa ka diskohan didto sa lungsod sa Mabini sayo sa kabuntagon kagahapon.

Ang biktima nga si Alex Igmilan, 21-anyos, nagpuyo sa Sitio Nangka naigo sa walang bahin sa iyang tiyan ubos sa iyang dughan ug anaa karon sa malisud nga kahimtang human gidala didto sa Gov. Celestino Gallares Memorial Regional Hospital sa dakbayan sa Tagbilaran.

Suspetsado giila nga usa ka Mario Ladaran, 34, minyo, taga-barangay Minol sa samang lungsod.

Nahitabo ang insidente mga alas 12:15 lapas sa tungang gabii kagahapon samtang ang biktima naglingaw-lingaw sa usa ka disko dihang kalit nga gihansakan sa suspetsado og usa ka mahait nga hinagiban sa way igong hinungdan.

Gisikop ang natumbok nga suspek sa mga sakop sa Mabini Police Station human sa insidente. (Andy Nalzaro)

Habal-habal drayber naghikog

PATAY nang napalgan ang usa ka habal-habal drayber human kini naghikog pinaagi sa paghikot og pisi sa iyang liog didto sa ilang pinuy-anan sa barangay salvador, Sierra-Bullones, Bohol niadtong Biyernes sa buntag.

Biktima nailhan nga si Ramil Unajan, 37-anyos, ulitawo, nagpuyo sa maong lugar.

Sa taho sa kapulisan nga ang biktima nakit-an nga patay na sa iyang igsuon nga si Elmer Unajan mga alas 10 sa buntag sud sa iyang lawak diin ang biktima nigamit og usa ka pisi nga gihikot sa iyang liog diin ang tumoy niini gigaid sa babag nga kahoy.

Sigun sa pakisusi sa municipal health officer sa maong lungsod nga ang pagkatuok maoy hinungdan sa kamatayon sa maong biktima ug walay nagpaluyo nga tinunto sa hitabo. (Andy Nalzaro)

Magtiayon giambush didto sa Tubigon, patay

Ang biktima giingong suod ni Mayor Jao

USA ka magtiayon gi-ambush patay sa duha ka wala mailhing armadong lalaki nga pulos nagtabon og sinina sa mga nawong didto sa nasudnong dalan sa barangay Pooc Occidental, Tubigon, Bohol kagahapon sa buntag.

Mga biktima nailhan nga si Alphonseus Boligao, 34, minyo, empleyado sa munisipyo sa Tubigon ug ang iyang asawa nga si Maricor, pulos nagpuyo sa maong lugar.

Si Alphonseus naigo sa iyang likod ug nabugtuan sa iyang kinabuhi dihang gihatud sa Tubigon Community Hospital.

Samtang si Maricor kinsa dunay duha ka samad pinusilan sa iyang likod gidala sa Ramiro Community Hospital sa dakbayan sa Tagbilaran, gideklarang patay na dihang nadangat sa maong tambalanan.

Sa taho sa kapulisan nga samtang ang mga biktima nagsakay sa ilang Toyota Corona kolor pula nga kotse nga may plaka 898-GAR mga alas 10:30 sa buntag gikan sa Du Ek Sam ug padung na mopauli dihang gisabayan og usa ka itom nga Honda XRM nga walay plaka.

Matud ni SPO4 Anecito Alipoyo sa Tubigon Police Station nga giingon nakabantay ang magtiayon sa duka ka suspetsado ug gigugkod apan gipusil kini sa makadaghang higayon.

Nisibat ang mga suspetsado kinsa pulos nakasul-ob og itom nga jacket paingon sa direksiyon didto sa lungsod sa Clarin.

Niingon si Alipoyo nga nakakuha sila og 11 ka basiyong bala ug tulo ka slug sa klaibre .45 nga pistola.

Nibutyag si Alipoyo nga ang biktima kinsa usa ka suod nga higala ni Mayor William Jao adunay mga kontra ug gituohang daang dumot ang hinungdan sa maong krimen.

Dugang niya nga dunay gikasuhan ang maong biktima human kini gipusil diin ang usa sa mga suspetsado usa ka barangay kapitan sa barangay Potohan nga si Roy Yosoya niadtong nakalabay nga tuig apan wala nila matumbok kun kinsa ang responsable sa maong hitabo. (Andy Nalzaro)

Presensiya sa sa 50 ka mga armado didto sa utlanan Dimiao ug Valencia dili tinuod: Army

GIKLARO sa Philippine Army nga dili tinuod ang ningtumaw nga taho nga dunay presensiya sa 50 ka mga armadong tawo didto sa bukirang bahin sa utlanan sa mga lungsod sa Dimiao ug Valencia.

Si Lt. Col. Romeo Brawner, commanding officer sa 2nd Special Forces sa Philippine Army nga nakabase didto sa barangay Riverside, Bilar, Bohol nibutyag sa usa ka pakighinabi sa usa ka sibyaanan sa radyo.

Matud ni Brawner nga walay basehan ang ninggawas nga report kinsa nikatap human dunay tulo ka mga lalaki, usa niini nakuhaan og armas nadakpan didto sa lungsod sa Dimiao niadtong nakalabay nga semana.

Apan bisan pa niini, niingon si Brawner nga padayon gihapon ang ilang pagmonitor kalabot sa maong taho.

Sayo niini, ang probinsiya sa Bohol gideklarang insurgency-free atol sa Regional Peace and Order Council meeting sayo ning tuiga sa administrasyon ni kanhi Gob. Erico Aumentado. (Andy Nalzaro)