Ginang giluba sa iyang bayaw didto sa Lila

suspek naitok kay gikasab-an sa biktima

GRABENG hingsamdan ang usa ka ginang human gidunggab sa iyang bayaw nga lalaki dihang gikasab-an human gisumbag sa maguwang sa suspetsado atol sa anti-desperas didto sa barangay Bongcogan Ubos, Lila, Bohol niadtong Lunes sa gabii.

Ang biktima nga si Marissa Adanza, 35, live-in partner sa maguwang sa suspetsado, nagpuyo sa maong dapit, naigo sa buko-buko ug padayon pang giatiman didto sa Gov. Celestino Gallares Memorial Regional Hospital sa dakbayan sa Tagbilaran.

Suspetsado nailhan nga si Jennifer Acaso, 22, ulitawo, lumad sa barangay San Isidro, Pilar, Bohol ug kasamtangang nagpuyo sa maong dapit.

Sa taho sa kapulisan nagbutyag nga samtang ang suspetsado kauban sa iyang mga higala nagtagay mga alas 5 sa hapon dihang niduol kaniya ang iyang maguwang nga lalaki nga si Rene Acaso kinsa lango sa ilimnong makahubog ug gisumbag.

Matud sa taho nga nipauli ang suspetsado sa ilang pinuy-anan apan gisugat kini og kasaba sa biktima hinungdan nga nagkalalis.

“Niinit ang ulo sa suspek hinungdan nga gidunggab, ” asoy pa ni Inspector John Gelbert Basalo, hepe sa Lila Police Station ngadto sa Bohol Balita.

Niingon si Basalo nga narikober sa iyang mga sakop ang usa ka kutsilyo nga dunay gitas-on nga 13.5 pulgadas nga maoy gigamit sa krimen didto sa dapit nga nahitaboan.

Nisibat ang natumbok nga suspek apan nadakpan human nasigpatan duol sa ilang pinuy-anan. (Andy Nalzaro)

Kolektor sa lending gitulis sa 2 ka armado sa S-Bullones

KOLEKTOR sa usa ka kompaniya sa lending gitulis sa duha ka wala mailhing armadong lalaki didto sa barangay Bugsok, Sierra-Bullones, Bohol kagahapon sa ala-una sa hapon.

Biktima nailhan nga si Noel Isiang, 22, ulitawo, taga-Poblacion, Tubigon, Bohol ug kolektor sa RT Lending nga nakabase didto sa lungsod sa Guindulman.

Sigun sa asoy sa biktima nga samtang siya nagsakay sa iyang serbis nga motorsiklo gikan sa maong dapit dihang kalit lamang gibabagan sa duha ka mga lalaki nga armado og usa ka shotgun ug usa ka kalibre .45 nga pistola.

Matud sa taho nga ang lalaki nga nagbitbit og kalibre .45 nga pistola nga walay maskara nition kaniya ug nideklarar og tulis ug gihulgang pagapatyon kun magpakita sa iyang pagsukol.

Gikuha gikan sa maong biktima mao ang iyang koleksiyon nga mokabat ngadto sa P12,000 lakip na ang iyang Nokia cellphone nga mobalor og P5,000.

Pagkahuman niini, gikuha usab sa mga tulisan ang Honda Wave 100 kolor asul nga motorsiklo nga may plaka OF-7482 gikan sa biktima ug gisakyan sa mga suspek kinsa nisutoy paingon sa nasudnong dalan sa maong lungsod.

Dugang sa taho nga narikober sa mga niresponding kapulisan ang maong sakyanan nga gibiyaan didto sa nasudnong dalan sa barangay San Juan sa samang lungsod.(Andy Nalzaro)

21-anyos gidunggab sa kainom sa barangay Manga

KRITIKAL ang kahimtang sa usa ka 21-anyos nga lalaki human gidunggab sa iyang kauban sa tagay didto sa Purok 3, barangay Mangga, dakbayan sa Tagbilaran kagahapon sa alas 2 sa kaadlawon.

Biktima nailhan nga si Roegen Garces, ulitawo ug nagpuyo sa maong lugar.

Naigo ang biktima sa walang bahin sa iyang dughan ug gidala didto sa Gov. Celestino Gallares Memorial Regional Hospital sa siyudad ug giingong anaa sa talandugon nga kahimtang.

Suspetsado giila nga usa ka Beedk Esto, nagpuyo gihapon sa samang lugar.

Sa taho sa kapulisan nga samtang ang biktima kuyog sa iyang mga higala gikan sa usa ka disko sa naasoy nga lugar ug nagtagay didto sa balay sa usa ka Raden dihang nakabagat og panaglalis sa suspetsado.

Matud sa taho nga atol sa ilang panaglalis, gihansakan ang maongf biktima og usa ka mahait nga hinagiban sa maong suspek.

Nisibat ang natumbok nga responsable ug padayon pang gipangita sa mga ginskpan sa Tagbilaran City Police Station. (Andy Nalzaro)

Ulitawo giluba sud sa usa ka diskohan, kritikal

GRABENG hingsamdan ang usa ka ulitawo human gidunggab sa usa ka diskohan didto sa lungsod sa Mabini sayo sa kabuntagon kagahapon.

Ang biktima nga si Alex Igmilan, 21-anyos, nagpuyo sa Sitio Nangka naigo sa walang bahin sa iyang tiyan ubos sa iyang dughan ug anaa karon sa malisud nga kahimtang human gidala didto sa Gov. Celestino Gallares Memorial Regional Hospital sa dakbayan sa Tagbilaran.

Suspetsado giila nga usa ka Mario Ladaran, 34, minyo, taga-barangay Minol sa samang lungsod.

Nahitabo ang insidente mga alas 12:15 lapas sa tungang gabii kagahapon samtang ang biktima naglingaw-lingaw sa usa ka disko dihang kalit nga gihansakan sa suspetsado og usa ka mahait nga hinagiban sa way igong hinungdan.

Gisikop ang natumbok nga suspek sa mga sakop sa Mabini Police Station human sa insidente. (Andy Nalzaro)

Magtiayon giambush didto sa Tubigon, patay

Ang biktima giingong suod ni Mayor Jao

USA ka magtiayon gi-ambush patay sa duha ka wala mailhing armadong lalaki nga pulos nagtabon og sinina sa mga nawong didto sa nasudnong dalan sa barangay Pooc Occidental, Tubigon, Bohol kagahapon sa buntag.

Mga biktima nailhan nga si Alphonseus Boligao, 34, minyo, empleyado sa munisipyo sa Tubigon ug ang iyang asawa nga si Maricor, pulos nagpuyo sa maong lugar.

Si Alphonseus naigo sa iyang likod ug nabugtuan sa iyang kinabuhi dihang gihatud sa Tubigon Community Hospital.

Samtang si Maricor kinsa dunay duha ka samad pinusilan sa iyang likod gidala sa Ramiro Community Hospital sa dakbayan sa Tagbilaran, gideklarang patay na dihang nadangat sa maong tambalanan.

Sa taho sa kapulisan nga samtang ang mga biktima nagsakay sa ilang Toyota Corona kolor pula nga kotse nga may plaka 898-GAR mga alas 10:30 sa buntag gikan sa Du Ek Sam ug padung na mopauli dihang gisabayan og usa ka itom nga Honda XRM nga walay plaka.

Matud ni SPO4 Anecito Alipoyo sa Tubigon Police Station nga giingon nakabantay ang magtiayon sa duka ka suspetsado ug gigugkod apan gipusil kini sa makadaghang higayon.

Nisibat ang mga suspetsado kinsa pulos nakasul-ob og itom nga jacket paingon sa direksiyon didto sa lungsod sa Clarin.

Niingon si Alipoyo nga nakakuha sila og 11 ka basiyong bala ug tulo ka slug sa klaibre .45 nga pistola.

Nibutyag si Alipoyo nga ang biktima kinsa usa ka suod nga higala ni Mayor William Jao adunay mga kontra ug gituohang daang dumot ang hinungdan sa maong krimen.

Dugang niya nga dunay gikasuhan ang maong biktima human kini gipusil diin ang usa sa mga suspetsado usa ka barangay kapitan sa barangay Potohan nga si Roy Yosoya niadtong nakalabay nga tuig apan wala nila matumbok kun kinsa ang responsable sa maong hitabo. (Andy Nalzaro)