Palasyo, gikumpirmar nga mihatag og P5-M sa MILF

TAGBILARAN CITY, Bohol, Oct. 26 (PIA)–Gikumpirmar sa Malakanyang nga mihatag ang gobyerno og P5 milyon sa Moro Islamic Liberation Front (MILF). Apan gitataw ni Presidential Spokesman Edwin Lacierda nga wala gihatag ni Presidente Benigno “Noynoy” Aquino III ang maong salapi kang MILF Chairman Al Haj Murad Ibrahim sa ilang secret meeting sa Tokyo, Japan niadtong Agosto 5, apan si Government Peace Panel Chief Negotiator Marvic Leonen ang mihatag niini human sa maong pulong. Gi-klaro usab ni Lacierda nga P5 milyon ug dili P5 bilyon ang salaping gihatag sama sa mga gipakatap sa text.

Giingong gamiton ang salapi sa pagpatukod og Bangsamoro Leadership Management Institute (BLMI) ug dili sa pagpalit og mga bala ug armas sa mga rebelde. Giseguro usab sa Malacañang nga adunay “accounting” sa P5 million nga gihatag. Dugang pa ni Lacierda, ang maong kantidad commitment pa sa miaging administrasyon sa MILF ug nakita sa Presidente nga angayan sad kining ipadayon. Gilauman sa gobyerno nga ang maong pondo igahin alang sa edukasyon ug pagbansaybansay sa mga lider sa Bangsamoro. (PIA-Bohol/ecb)