SWS: Satisfaction rating ni PNoy, nagpabilin sa 62%

TAGBILARAN CITY, Bohol, July 26 (PIA) – NAGPABILIN’G “good” o maayo ang net satisfaction rating sa administrasyong Aquino sa pinaka-ulahing survey nga gihimo sa Social Weather Stations (SWS).  Sa SWS survey nga gihimo gikan Hunyo 3 hangtud 6, nakakuha og 62% sa mga respondents ang satisfied ug 17% ang dissatisfied nga naghatag sa performance rating sa administrasyon og net score nga +45%.

Ang resulta sa survey sa bulan sa Hunyo ni ubos og usa ka ponto gikan sa bulan sa Marso og mas ubos sa record nga “very good” +64% nga nakuha niadtong bulan sa Setyembre ug Nobyembre sa miaging tuig.  Bisan pa niini, ang SWS nagkanayon nga ang pinaka-ulahing rating sa administrasyong Aquino mas taas kun itandi sa tanang rating nga natala sukad sa tuig 1986.

Base sa resulta sa maong survey, ang mga respondents natagbaw sa gibuhat sa administrasyong Aquino sa 17 ka isyu nga adunay record high sa pagtabang sa kagamhanan sa mga Filipino migrant workers ug paggukod sa mga tax evaders.  Samtang nakahuha og failing mark apan mas taas pa hinuon sa grado niadtong bulan sa Marso ang resolution of the Maguindanao massacre.

Ang pagpagawas sa resulta niining maong survey natunong usab sa ikaduhang State of the Nation Address (SONA) ni Presidente Aquino. (PIA-Bohol/ecb)

Submit a Comment