“Sin tax” aprubado na sa Kamara

TAGBILARAN CITY, Bohol, June 07 (PIA)–Gipalig-on na sa Kamara ang ikatulo ug katapusang pagbasa sa balaodnon nga nagtinguha nga dugangan ang buhis sa sigarilyo ug bino.

Sa gihimong botohan sa plenaryo kagabii, 210 ang mi-pabor sa House bill 5727 samtang 21 ang nibabag niini ug lima usab ang mi-abstain.

Nakalatid ubos sa gipalig-on nga sin tax nga 2-tier nga buhis sa sigarilyo, diin ang sigarilyong adunay presyo nga hangtud P11.50 matag pakete isaka ang buhis sa P12 matag pakete gikan sa kasamtangang P2.75.

Ang sigarilyo nga labaw sa P11.50 matag pakete ang presyo pahamtangan na og buhis nga P28 matag pakete.

3-tier usab ang buhis sa mga bino diin ang sa distilled spi-rits nga adunay presyong dili moabot sa P90 mahimong P20 na ang buhis sa matag litro ug P80 matag litro usab ang buhis sa adunay presyong P90 apan dili moabot sa P150, samtang P320 matag litro ang buhis sa adunay presyong P150 pataas.

Alang sa sparking wine o champagne, kun ang net retail price sa 750 ml P500, mahimong P250 na ang buhis niini ug P700 usab ang buhis sa kapin sa P500 ang presyo.

Ang still wine ug carbonated wine nga mas ubos sa 14% ang alcohol content buhisan na og P30samtang P60 na ang mahimong buhis sa may 14%-25% nga alcohol.

Katuyuan sa gobyerno nga makakuha og P33 bilyon matag tuig gikan sa 2-tier nga buhis gikan sa sigarilyo samtang 3-tier usab sa mga produktong bino. (PIA-Bohol/ecb)

Submit a Comment