TAGBILARAN CITY, January 19 (PIA)–Kun dili maayo ang panahon, may color coding advisories nga tigpagawas ang Philippine Atmospheric, Geophysical and Astronomical Services Administration (PAGASA) isip pasidaan sa posibleng gidaghanon sa ibundak nga ulan.

 

Ubos sa rainfall advisory, kun kusog gani ang ulan, yellow rainfall advisory ang iisa kun gipaabot nga 7.5 mm hangtud 15 mm ang ibubo nga ulan sa mosunod nga usa  ka oras ug gipaabot nga magpadayon pa kini.

 

Gitambagan ang mga maigong lumulupyo niining lugar nga magbinantayon, mahimong alerto sa kundisyon sa ulan ug hatagan og pasidaan nga mahimong magbaha sa mga ubos nga lugar.

 

Samtang ang orange rainfall advisory usab iisa sa mga lugar nga gipaabot nga makasinati og 15 mm hangtud 30 mm nga pagbubo sa ulan sa mosunod nga usa  ka oras. May hulga kini nga pagbaha sa mga lumulupyo niining lugara.

 

Kun makunsiderar nang emergency ang pagbubo sa ulan, red rainfall advisory ang iisa.

 

Mahitabo kini kun kapin sa 30 mm ang ibubo nga ulan sa mosunod nga usa  ka oras o kun tulo ka oras nang nagpadayon ang kusog nga ulan ug mokabat na sa 65 mm.

 

Kun gi-isa sa PAGASA ang red rainfall advisory, gipaabot na ang paglihok ug pagtubag sa katawhan tungod kay makuyaw na ang baha ug angay nang mag-andam sa pagbakwit ang mga residente paingon sa mas luwas nga lugar. (ecb/PIA7-Bohol)