NAGNEGATIBO sa radiation ang hangin sa Pilipinas base sa pinaka-ulahing pagsusi sa
Philippine Nuclear Research Institute (PNRI).
Alas 9:00 ganinang buntag (Martes) sa dihang gisugdan pagsusi sa grupo ni PNRI Senior
Researcher Lorna Jean Palad gamit ang gamadose rate meter sa hangin sa palibot sa PNRI
compound sa Commonwealth Avenue, Quezon City.
Gipahayag ni Palad nga kaniadto, ka-usa lamang kada semana kun magpahigayon sila sa
radiation test apan tungod sa nahitabong pagbuto sa nuclear reactors sa Fukushima Daiichi
Nuclear Power Plant sa Japan, kada-adlaw na nila kini gihimo.
Matud pa ni Palad nga kalima ginahimo ang pagsusi sa lima ka PNRI compound matag duha
ka oras sugod 9:00 sa buntag hangtud alas 5:00 sa hapon ug ika-10 kini gibalik-balik aron
makasiguro sa resulta.
Samtang bisan una nang giingong walay basihan ang kahadlok nga moabot sa Pilipinas ang
radioactive leak gikan sa Japan, gisiguro sa Department of Science and Technology (DOST)
nga nangandam gihapon ang Pilipinas kun mahitabo kini.
Matud pa ni DOST Secretary Mario Montejo, may mga pamaagi sila aron matumbok kun ang
mga produktong gikan sa Japan adunay traces sa radioactive materials.
Giingong gihimo na nila kini niadtong mibuto ang Chernobyl Power Plant sa Russia ug mao
usab kini ang ilang himuon kun mahitabo usab kini sa Japan.
Bisan pa niini, gibalik ni Montejo nga gamay ra kaayo ang posibilidad nga maigo sa
radioactive materials ang Pilipinas tungod kay gawas nga dili padung sa Pilipinas ang
direksiyon sa hangin gikan sa Japan, hanap usab maadto sa kabaybayonan sa Pilipinas kun
makontamina ang kadagatan sa Japan tungod kay ang direksyon sa bawod palayo man sa
Pilipinas. (ecbPIA-Bohol)
