PNoy, byaheng UK

TAGBILARAN CITY, Bohol, June 04 (PIA)–Gilauman ang mga puhunan nga dalhon sa pagpaule ni Presidente Benigno “Noynoy” Aquino III gikan sa iyang pagbisita sa United Kingdom (UK).

Ganinang 1:30 sa hapon migikan ang delegasyon sa Presidente padung sa London sakay sa PR flight 001 sa Ninoy Aquino International Airport (NAIA) terminal 2.

Matud pa ni Deputy Presidential Spokesperson Abigail Valte, nakahan-ay sa schedule sa Presidente ang pakig-pulong sa nagkalain-laing business groups sa UK.

Dugang pa ni Valte nga posibleng didto na plantsahon ang mga proyektong pagapondohan ubos sa Public-Private Partnership (PPP) program.

Sa maong biyahe, maka-atubang ni Presidente Aquino si Prince Andrew isip tinugyanan ni Queen Elizabeth nga okupado karon sa selebrasyon sa iyang Diamond anniversary isip reyna.

Gikan sa London, modiretso na ang Presidente sa Estados Unidos alang sa iyang one-on-one meeting kang US President Barack Obama sa Washington D.C. (PIA-Bohol/ecb)

Hunyo 11, dili holiday

TAGBILARAN CITY, Bohol, June 04 (PIA)–Wala gideklarar sa Malacañang nga special non-working holiday ang Hunyo 11 bisan natunong kini sa adlaw nga Lunes isip pagsaulog sa Independence Day sa Hunyo 12 nga natunong sa adlaw nga Martes, nga usa ka regular holiday.

Matud pa ni Deputy Pre­sidential Spokesperson Abigail Valte, magpabilin mismo sa maong adlaw sa Hunyo 12 ang pagsaulog sa “Adlaw sa Kagawasan ” o “Independence Day” sa nasud.

“We will celebrate as it falls so June 12, Tuesday,” matud pa ni Valte.

Kini tungod usab sa Proclamation No. 295, s. 2011, nga nauna nang gilagdaan ni Presidente Benigno “Noynoy” Aquino III, nga listahan sa mga regular ug legal holiday nga isaulog sa nasud karong tuig 2012.

Kahinumdoman nga wala nisunod si Presidente Aquino sa naandan’g holiday economics ni kanhi Presidente Gloria Macapagal-Arroyo, diin gibalhin sa adlaw nga mas duol sa weekend ang mga holiday aron mahatagan ang katawhan og mas taas nga bakasyon. (PIA-Bohol/ecb)

PRESS RELEASE

Philippine Information Agency

Tagbilaran City Information Center

411-2292/ 501-8554/ 0920 954 5482 email piabohol171@yahoo.com

Bag-ong sumbanan sa suspensyon sa klase kun adunay bagyo, gipagawas sa DepEd

TAGBILARAN CITY, Bohol, June 04 (PIA)–Nipagawas na ang Department of Education (DepEd) og bag-ong sumbanan kalabot sa pagsuspinder og klase kun adunay bagyo o kalamidad.

Katoyuan sa DepEd Order No. 43 nga himuong sistematiko ang pagsuspinder sa klase aron maluwas ang publiko sa kakuyaw nga dala sa bagyo, pagbaha ug uban pang natural disaster.

Ubos sa maong kamanduan, gitambagan ang mga opisyal sa tunghaan, regional ug division school officials, ug mga ginikanan nga i-monitor ang weather bulletin sa Philippine Atmospheric, Geophysical and Astronomical Services Administration (Pagasa).

Dinhi pa gihapon magbase kun i-suspinder na ang mga klase o dili.

Ubos sa bag-ong order, otomatikong suspendido na ang klase sa pre-school ug kindergarten kun isaka na ang Storm Signal No. 1

Suspendido usab ang klase sa pre-school, kindergarten, elementary ug high school kun isaka na ang Storm Signal No. 2.

Mahimo usab nga dili na motungha sa trabaho ang mga DepEd employees kun Storm Signal No. 3 na.

Gawas niini, miingon usab ang DepEd nga epektibo ang whole-day suspension sa mga lugar nga adunay storm signal gikan alas-10:00 sa gabii hangtud alas-4:30 sa kadlawon nga gisundan niini.

Kini nagpasabot lamang nga otomatikong suspendido na ang klase sa mga nahisgutang level kun adunay storm signal ang usa ka lugar, tibuok gabii o binuntagay, sa dili pa ang oras sa pagsulod sa klase.

Samtang otomatikong i-ubos ang half-day suspension kun sa wala pa ang alas-11:00 sa buntag napaubos na ang storm signal. Dili na kinahanglan pang maghuwat sa official announcement ug sundon dayon ang automatic half-day suspension.

Sukwahi sa mga naandan, naa na sa mga kamot karon o prerogative na sa mga local government unit (LGU) officials ang pagsuspinder sa klase sa ilang ginsakopan nga lugar kun gikinahanglan.

Epektibo usab kini kun adunay baha, linog, tsunami, landslide ug sunog. (PIA-Bohol/ecb)

Submit a Comment