PNoy andam motabang alang sa kaugmaran sa Bohol

TAGBILARAN CITY, Aug. 2 (PIA)–ANDAM si Presidente Benigno Simeon Aquino III nga motabang alang sa gitinguha nga kaugmaran sa lalawigan sa Bohol isip bugti sa gihatag nga landslide nga kadaugan sa mga Bol-anon kaniya sa milabay nga piniliay.  Gipadangat sa mga Bol-anon sa Presidente ang mga nag-unang isyo sama sa dugay nang gipangandoy nga katukoran sa bag-ong tugpahanan sa lungsod sa Panglao, ang
water waste disposal ug ingon man usab ang solid waste ug uban sa mga proyekto sa imprastraktura sama sa kadalanan.

Ang katukoran sa bag-ong tugpahanan sa Panglao ang kanunay nga giduso nilang Gov. Edgar Chatto ug Kongresista Rene Relamapagos sa unang distrito nga mahatagan kini og suporta sa pamunoan ni Aquino taliwala sa nagka-problema nga naghuot nang tugpahanan sa Tagbilaran City Airport.  Sa gihimong project briefing sa gilaraw nga New Bohol Airport, ang Presidente nagkanayon nga ang maong P8.4 bilyon airport sa lungsod sa Panglao maoy nag-unang agenda sa unang pagduaw niya dinhi sa lalawigan sukad Hunyo sa miaging tuig.

Gipanglantawan sa kagamhanan nga ang gilaraw nga bag-ong tugpahanan makahatag og mas maayong serbisyo sa nagkadaghang bisita sa lalawigan.

Gawas sa pag-accommodate sa gagmay nga aircrafts sama sa Airbus 319 ug Airbus 320,  ang 2.5 kilometer runway maka-accommodate usab ug mas dagkong abyon sama sa Airbus 330.  Gikonsidera usab ang mga foreign regional flights sa paghuman sa maong tugpahanan.  Adunay kinatibuk-ang 2,291,802 ektarya nga luna ang nakuha na nga naglangkob sa upat ka barangay sa lungsod sa Panglao diin tukoran ang maong tugpahanan. Aduna pay gitinguhang isabot-sabot nga dugang 57.31 ektarya alang sa bag-ong pasilidad. (PIA-Bohol/ecb).

Submit a Comment