TAGBILARAN CITY, Bohol, July 18 (PIA)–Malipayon’g gidawat ni Foreign Affairs Secretary Albert del Rosario ang gisang-at nga House Resolution No. 352 nga nanawagan alang sa “peaceful and collaborative resolution of maritime territorial disputes in the South China
Sea and its environs and other maritime areas adjacent to the East Asian mainland” sa ubang miyembro sa United States House of Representatives.
Sa taho sa Philippine Embassy sa Washington D.C., si Representative Ileana Ros-Lehtinen, Chair sa United States House Committee on Foreign Affairs, ang nisang-at sa House Resolution ug co-sponsors niini silang Representative Don Manzullo, Chairman sa House Subcommitttee on Asia and the Pacific, ug Representative Eni Faleomavaega, Ranking Member sa House Subcommittee on Asia and the Pacific.
Adunay 27 ka magbabalaod nga nag-co-sponsor sa resolusyon nga gilangkoban sa 18 ka Republicans ug 9 ka Democrats. Suportado sa House Resolution ang posisyon sa Pilipinas sa malinawon, multilateral ug rule-based settlement sa kasungi-an sa Spratly Islands base sa international law ug gikondena ang paggamit og puwersa aron maresolba ang problema.
Sa maong resolusyon, pipila ka probisyon ang nahimong gibasihan, apil na ang giingon niadtong Hunyo 23, 2011 ni Secretary of State Hillary Rodham Clinton sa nibisitang si Foreign Secretary Del Rosario nga determinado kini ug committed aron suportahan ang pagdepensa sa Pilipinas.
Gitumbok usab sa resolusyon ang giingon ni Secretary Del Rosario nga ang Pilipinas usa lamang ka gamay nga nasud apan andam mohimo sa bisan unsang angay buhaton aron mapanalipdan ang teritoryo niini. Nakabutang usab sa probisyon ang pahayag sa US nga andam kining tabangan ang Pilipinas aron imo-dernisa ang militar.
Nauna niini, gi-aprubahan sa US Senate ang resolusyong gisang-at ni Senator Jim Webb nga nisupak sa paggamit og puwersa sa China sa South China Sea ug nanawagan og malinawon, multilateral resolution sa maritime territorial disputes sa Southeast Asia. (PIABohol/ecb)
