Bohol News Daily

Pilipinas, planong magpadala og emisaryo sa Taiwan

GI TUN-AN sa gobyerno ang pagpadala og emisaryo sa Taiwan aron ipasabot ang
kasungian mahitungod sa pagpa-deport sa 14 kaTaiwanese paingon sa China.

Niingon si Justice Secretary Leila de Lima nga mahimong ipaagi ra usab sa Manila Economic
and Cultural Office (MECO) ang himuong pagpasabot sa Taiwan.

Gipasabot ni De Lima nga gihimo lamang sa Pilipinas ang maong lakang aron
maprotektahan ang interes sa nasud sa giingong gihimo lamang dangpanan sa mga langyaw
ang atong nasud alang sa mga kriminal nga aktibidad.

Apan gipahinomdum sa kalihim nga adunay nahimong kasabutan tali sa Taiwan ug China
mahitungod sa prosekusyon sa mga dili mosunod sa ilang mga balaod.

Tungod kay dili naman parte niini ang Pilipinas, ang Beijing ug Taipei lamang daw ang
makasulbad sa maong hilisgutan. (ecbPIABohol)