SEGUN sa Washington Post, tungd sa way puas nga paningkamot, ang Pilipinas na ang nasud nga may labing dakong gamit sa gahum geothermal.
Dugang niini, sa hisgutanan sa napahimutang nga kapasidad sa paggamit sa gahum geothermal, ikaduha ang Pilipinas, sunod sa Estado Unidos kinsa giila nga may bentaha sa talento ug kapasidad sa pag-ugmad sa gahum geothermal.
Matud pa, 28% na ang gahum dagitab nga nakuha sa Pilipinas gikan sa gahum geothermal, nga maot usa sa mga rason nganong napakunhod sa nasud ang pagsalig sa imported nga lana igsusugnod.
Gani, gibasol pa sa gitahud nga mantalaan ang way tataw nga palisiya sa Estados Unidos kabahin sa pag-ugmad sa geothermal, sahi sa gihimo sa Pilipinas.
Kahinumduman nga sukad pa sa 1970 ang pagpaningkamot sa nasud nga maugmad ang geothermal. (PIA/rachiu)
