Bohol News Daily

Pangagpas nga ipalawig ang termino ni PGMA sa cha-cha, walay basehan- Dureza

Walay basehan ang pangagpas sa mga taga oposisyon nga ipalawig ang termino ni Presidente Gloria Macapagal Arroyo kon madayon ang cha-cha. Mao kini ang gipatin-aw ni Jesus Dureza, Kalihim sa Prensa.

Matud pa ni Dureza, huna-huna ra kana sa mga taga-oposisyon nga kon madayon ang pag-usab gikan sa pederal nga sistema sa kagamhanan gikan sa “presidential” pina-agi sa pag-usab sa batakang balaud, dili moluwat sa pangatungdanan si Presidente Arroyo inig-abot sa tuig 2010.

Ang pagduda nabunga tungod sa pagsuporta sa Presidente sa resolusyon number 10 sa Senado nga gipangamahan ni Senador Aguilino Pimentel, ug uban pang 16 ka senador, lakip na si Senador Manuel Villar.

Gipasabot ni Dureza nga misuporta ang Malakanyang sa maong resolusyon tungod kay haum kini sa tinunga sa kagamahanan ug mga pilipino aron makab-ot ang autonomiya ug kalinaw, labina sa Mindanao.

Ang resolusyon mipatawag og usa ka “constituent assembly” sa kongreso sa pag-usob sa batakang balaud; ug tin-aw usab nga wala niini misay-say nga palawigon ang termino ni Presidente Arroyo, dugang ni Dureza.

Ang problema nga nakita kay sobra ra ka-ayo ang kritisismo ug ka-negatibo sa panghuna-huna sa uban nga usahay makaingon sa pagkalangan sa mga lakang ug reporma sa kagamhanan, alang unta sa kaayuhan sa katawhan, dugang ni Dureza.

Gipahinumdum usab sa Kalihim nga daghang mga okasyon nga milabay nga gipalanug sa presidente nga moluwat siya sa pangatungdanan sa pagtapos sa iyang termino sa tuig 2010. (PIA/Bohol)