TAGBILARAN CITY, November 2 (PIA)–Duha ka low pressure areas ang gibantayan karon sa Philippine Atmospheric Geophysical and Astronomical Services Administration (PAGASA) nga posibleng mahimong bagyo.
Matud pa sa Philippine Atmospheric, Geophysical and Astronomical Services Administration (PAGASA), posibleng mokabat sa tulo ka bagyo ang gipaabot nga mo-igo sa nasod karong bulan sa Nobyembre.
Ugma sa buntag, gitakdang mosulod sa nasod ang bagyong gibantayan sa PAGASA nga naa pa gawas sa Philippine Area of Responsibility (PAR).
Sa 11AM update sa PAGASA, ang tropical depression kataposang nasigpatan sa 1,315 kilometros sidlakang Visayas.
Dala niini ang kakosgon sa hangin’g mokabat sa 45 kilometro matag oras ug pagbugso nga mokabat sa 55 kilometros matag oras.
Naglihok ang bagyo sa kusog nga 15 kilometros matag oras sa direksyong Kasadpang Amihanang-Kasadpan.
Matud pa sa PAGASA, ugma sa buntag mosulod ang bagyo ug hinganlan kini og “Marce”.
Una nang miingon ang PAGASA nga ang usa pa ka bagyo nga nasigpatan Sidlakang parte sa Luzon gamay og tsansa nga mosulod sa nasod. (ecb/PIA7-Bohol)
