NAKADAWAT og talagsaong pagdayeg si Presidente Aquino gikan ni Senador Joker Arroyo
sa desisyon niini nga wala magpadala og representante sa Pilipinas alang sa Nobel Peace
Prize awarding ceremony.
Mao kini ang nahimong desisyon sa Presidente aron ma-engganyo ang China nga dili
ipadayon ang pagbitay sa lima ka overseas Filipino workers (OFWs) nga napahamtangan og
kamatayon tungod sa kasong drug trafficking.
Giangkon sa Presidente nga mas prayoridad sa gobyerno ang national interest aron maluwas
ang mga Pinoy nga bitayon sa China.
Gikompirma usab sa Department of Foreign Affairs nga walay mapadalang representante
ang Pilipinas sa Norway alang sa awarding sa Chinese dissident nga si Liu Xiaobo nga
napreso og 11 ka tuig tungod sa subversion case.
Nasagmuyo ang kagamhanang China sa nahimong desisyon sa Nobel Prize committee
human nga si Liu ang napiling modawat og pasidungog.
Nibahad ang China sa mga nasud nga maapektuhan ang ilang relasyon o diplomatic ties kon
magpadala og tinugyanan ug suportahan ang maong pasidungog kang Liu.
Aduna nay gidusong apela si Presidente Aquino sa gobyerno sa China nga nangayo og
clemency alang sa lima ka Pinoy nga nasentensyahan og kamatayon.
Gitandi ni Senador Arroyo ang maong desisyon ni Presidente Aquino sa kanhi
administrasyong Arroyo sa pag withdraw sa tropang Pinoy gikan sa Iraq nga matud pa niya
nga dili sayon nga himuong desisyon. (PIA-Bohol)
