Bohol News Daily

Opisyal mihagit sa mga molansaray Pagpa-una sa rabies sa ilang agenda

GIHAGIT sa usa ka opisyal sa barangay ang tanang molansaray sa umaabot nga Oktubre 25 sa
pagpaseguro sa ilang agenda sa pagpa-ugmad ang pagpatunhay sa nasugdang kampanya batok sa
rabies.

Matud ni Barangay Captain Cristobal Rasonabe sa Haguilanan Catigbian, ang hisgutanan sa serbisyo
publiko nagtungtong usab sa paghatag sa kasagurohan sa public health.

Ang Barangay Haguilanan sa lungsod sa Catigbian maoy usa sa tulo ka barangay sa Bohol nga
ibangga alang sa labing maayong sumbanan sa nasudnong pagpatuman sa kampanya batok sa
rabies o kagaw sa iro, butyag ni Dr. Stella Marie Lapiz sa Kapihan sa PIA niadtong milabayng
Huwebes.

Nakadayeg ang mga tinugyanan sa Bohol sa mga kalidad sa pagkapangulo ni Rasonabe tungod sa
lig-on niining pagpasunod sa balaod sa pagpugong sa rabies.

Miangkon usab si Rasonabe nga dili lalim ang ilang nasinati nga pagsupak sa katawhan niadtong
ilang gisugdan ang kampanya sa pagpangga sa ilang mga binuhi ug sa pag-atiman niini aron dili
matakbuyan sa rabies.

Lisud apan kon masabtan na sa tanan, sayon na ang pagpatunhay niini, matud niya. (PIA)