TAGBILARAN CITY, Bohol, Oct. 04 (PIA)–Opisyal nang gipahibalo sa Malakanyang nga regular holiday ang Oktubre 15 sa tibuok nasud isip pagtimaan sa Eid’l Adha o Feast of Sacrifice.
Kini human gilagdaan ni Presidente Benigno ‘Noynoy’ Aquino III ang Proclamation No. 658.
Tuyo niining mahatagan og kahigayonan ang mga igsuon natong Muslim aron isaulog ang maong okasyon.
Ang Eid al-Adha o Feast of Sacrifice ang kapistahang gisaulog sa mga Muslim sa tibuok kalibotan aron hinomdoman ang pagsunod ni Ibrahim nga isakripisyo ang iyang anak nga lalaking si Ismael isip usa ka buhat nga pagsunod sa Diyos.
Kini ang ikaduha ug katapusan sa duha ka mga kapistahang Eid nga gisaulog sa mga Muslim nga gi-base gikan sa Kuran.
Sama sa Eid al-Fitr, ginasugdan ang Eid al-Adha pinaagi sa usa ka hamubong panalangin nga gisundan sa usa ka sermon.
Tinuig nga matunong ang Eid al-Adha matag ika-10 ka adlaw sa buwan sa Dhul Hijja sa matag-buwang kalendaryong Islamiko.
Molanat ug tulo ka adlaw ang pagsaulog o kapin pa, depende sa nasud.
Nahitabo ang Eid al-Adha sa adlaw sa pagkahuman sa pagkanaug sa mga pilgrimong nagpahigayon og Hajj gikan sa Bukid sa Arafat (usa ka tinuig nga pilgrimahe sa Mecca nga naa sa Arabyang Saudi ang Hajj).
Base sa sumbanan sa Department of Labor and Employment (DOLE), makadawat og 200% sa ilang sweldo ang mga kawaning mosulod sa maong holiday samtang 100% usab sa mga dili mo trabahong empleyado. (ECB/PIA7-Bohol)
