OAV registration, gisugdan na karong adlawa

TAGBILARAN CITY, Bohol, Nov. 02 (PIA)–Gisugdan na karong adlawa sa Commission on Elections (Comelec) ang pagpalista sa mga overseas absentee voters (OAV) isip pagpangandam sa 2013 Senatorial ug Partylist elections. Kahinumdoman nga una nang gitakda sa poll body niadtong Oktubre 31 ang registration period, apan gi-oktaba kini human gi-deklarar sa Malacañang nga special non-working holiday ang maong petsa. Matud pa sa buhatan, ang registration himuon sa tanang mga authorized Comelec representatives sa tanang mga embahada ug konsulada sa Pilipinas sa tibuok nasud.

Giingong kinahanglan lamang i-presentar sa mga applicants ang ilang mga valid Philippine passports o kaha ang seaman’s book alang sa mga tripulanteng Pinoy aron makaparehistro. Una nang gipahayag ni Comelec Chairman Sixto Brillantes nga molanat ang registration period gikan Nobyembre 2, 2011 hangtud Oktobre 31, 2012. Samtang giingong pabor usab ang Comelec sa gidusong online polls alang sa overseas absentee voting. Matud pa ni Comelec Spokesman James Jimenez, mas praktikal kini alang sa mga overseas Filipino workers (OFWs) nga kadaghanan nagpuyo layo sa mga gibutang nga voting center. Nagtuo ang Comelec nga mahimong dakung tabang kini aron mapataas ang voters turnout sa OAV. (PIA-Bohol/ecb)

Submit a Comment