Mga pribadong tambalanan ngadto sa DOH: e-deklara ang dengue epidemic

GISUGYOT sa mga pribadong tambalanan sa Department of Health (DOH) niadtong Lunes nga e-deklara ang dengue epidemic tungod sa nagkasakang kaso sa dengue sa tibuok nasud ning tuiga.

Matud pa sa presidente sa Private Hospitals Association of the Philippines (PHAP) nga si Rustico Jimenez, ang paghimo sa deklarasyon makapa-aghat sa publiko nga mas magpakabana mahitungod sa kakuyaw sa sakit nga dengue.

Si Jimenez nagkanayon nga daghan pang mga Pinoy ang wala pa nagpakabana mahitungod sa maong sakit.

Sa kinatibuk-an, aduna nay 77,012 ka kaso sa dengue, apil na sa 543 nga nangamatay, ang natala gikan Enero 1 hangtud Setyembre 4 ning tuiga.

Samtang ang DOH, nisalikway sa pag-deklara og epidemic o state of calamity tungod kay ang ubang probinsya nitala og nagka-ubos nga kaso sa dengue, matud pa ni Dr. Eric Tayag, ang director sa National Epidemiology Center.
Gidugang ni Tayag nga mamahimo lamang mag-deklara kon adunay mga kondisyon sama sa: ang mga tawo nga nagka-dengue dili na matambalan sulod sa ilang panimalay tungod sa ka grabehon sa maong sakit; daghang nangamatay tungod sa maong sakit; ang mga tambalanan dili na makapasulod sa mga pasyente tungod sa kadaghan; ug grabeng pagkatap sa sakit nga dengue sa tanang lungsod.
Ang presidente sa PHAP planong makighisgut niining maong isyo sa mga opisyal sa DOH. (PIA)

Submit a Comment