MANILA, October 3 (PIA)–Nabalaka na usab ang Department of Education (DepEd) sa pagdaghan sa mga nataptan sa sakit nga Zika virus sa nasod.
Tungod niini, gitahasan ni DepEd Kalihim Leonor Briones ang tanang school official sa tibuok nasod nga motabang sa Department of Health (DOH) sa information campaign kun unsaon makalikay sa sakit nga zika virus nga gikan sa pinaakan sa lamok.
Nagpagawas na og memorandum si Briones nga nagmando sa tanang school superintendents, principals ug mga magtutudlo sa paghimo og mga lakang ug itudlo sa mga tinun-an kun unsaon paglikay sa maong sakit.
Matud pa ni Briones, mahinungdanon ang pagbaton og kaalam sa mga tinun-an kun unsaon paglikay sa sakit nga Dengue ug Zika virus ug kun unsaon pagtabang niining magpabilin ang kahinlo sa palibot.
Ang sakit nga zika dala sa zika virus (miyembro sa pamilyang Flavivirus), usa ka virus nga dala sa usa ka babayeng lamok nga Aedes aegypti. Kini usab ang matang sa lamok nga nagdala sa sakit nga dengue fever.
Kasagarang sintomas niini mao ang mura og trangkaso. May sintomas usab kini nga murag gi-dengue apan negatibo sa dengue test.
Makasinati og hilanat, pantal-pantal o rashes, pagsakit sa kalutahan, ug pagpamula sa mata nga murag sore eyes. Kining mga sintomas kasagarang molanat sa pipila ka adlaw hangtud usa ka semana gikan sa pagkapaak sa lamok. Susihon kini pinaagi sa dugo, ihi o laway kun positibo sa zika virus. (ecb/PIA7-Bohol)
