Mga Obispo mihulga og civil disobedience kalabut sa RH bill

MIHULGA ang mga Katolikong obispo nga ilang pangunahan ang kampanya sa civil disobedience kon mamahimong balaod ang kontrobersyal nga reproductive health (RH) bill.

Sa usa ka pagpakighinabi sa radyo niadtong Miyerkoles, ang pangulo sa Catholic Bishops’ Conference of the Philippines (CBCP) public affairs unit nga si Caloocan Bishop Deogracias Iñiguez Jr., nagkanayon nga ang population control angay nga trabahuon sa gobyerno ug sa simbahan. Apan ang simbahan hugtanon sa ilang baruganan nga ‘non-negotiable’ kabahin sa artificial contraception.

Matud pa ni Iñiguez nga hayan nga mamahimong balaod ang RH bill tungod sa bag-ohay lang nga pamahayag ni Presidente Benigno Simeon Aquino III nga pabor kini sa “responsible parenthood” nga maghatag og kagawasan sa mga magtiayon sa pagpili gikan sa natural ngadto sa artificial methods.

Niadtong Martes, ang Malacañang niingon nga dili bag-ohon ni Aquino ang iyang baruganan mahitungod sa responsible parenthood bisan pa sa pagbabag sa simbahan sa paggamit sa artificial birth control methods.

Apan matud pa ni Iñiguez nga magpabiling bukas ang simbahan sa usa ka diyalogo tali sa kagamhanan mahitungod niini ug kon adunay imbitasyon gikan sa gobyerno, pwede kining ipaagi sa CBCP Episcopal Commission on Family and Life. (PIA-Bohol)

Submit a Comment