Bohol News Daily

Malakanyang, bukas sa posibleng pagpakita ni Garcilliano

TAGBILARAN CITY, Bohol, July 21 (PIA)–Bukas ang Malakanyang sa posibleng pagpakita ni kanhi Commission on Elections (Comelec) Commissioner Virgilio Garcillano.  Matud pa sa tigpamaba sa Presidente nga si Edwin Lacierda, angay nga paminawon usab ang mga ibutyag
ni Garcillano sa giingong pagpanikas sa piniliay niadtong tuig 2004 ug 2007.

Kahinumduman’g si Garcillano ang gitawag nga “Hello Garci” nga giingong gikahinabi ni kanhi Presidente ug karon Pampanga Congresswoman Gloria Macapagal-Arroyo niadtong tuig 2004 nga piniliay.  Kalabot niini, gitataw sa Malakanyang nga wala’y nahitabong binayranay sa pagtahan ni kanhi Maguindanao Election Supervisor Lintang Bedol sukwahi sa alegasyong nibayad ang gobyerno og P30 milyon bugti sa pagtahan sa iyang kaugalingon sa kanhi election official.

Sigun pa kang Lacierda, dili batasan sa administrasyong Aquino ang mobayad bugti sa mga impormasyon ug dili usab scripted ang sunod-sunod nga paglugwa sa mga testigo sa giingong pagpanikas sa piniliay.
(Translated into Bol-anon by Elvira Bongosia/PIA-Bohol)