Luzon, Visayas gibutang usab sa high alert level sa PNP

GIBUTANG sa heightened alert status ang mga police units sa Luzon ug Visayas sugod Martes sa udto agig paglikay sa posibleng pagbalos sa pagpangatake sa grupo sa Abu Sayyaf.

Ang Philippine National Police (PNP) ug ang Armed Forces of the Philippines (AFP) nipasaka na sa ilang alert levels sa pinakataas nga status sa Mindanao human sa pagkamatay ni Gafur Jumdail, ang igsoong lalaki ni Abu Sayyaf lider Gumbahali Jumdail a.k.a. Dr. Abu, ug duha sa iyang mga sakop sa lungsod sa Maimbung sa milabay’ng Sabado.

Gimanduan na ni PNP chief Director General Jesus Verzosa ang tanang PNP units nga dugangan ang pagbantay ug seguridad sa tanang vital installations, lakip na ang mga airport, pantalan, simbahan, publiko ug ubang lugar nga tagbuanan nga posibleng target sa teroristang kalihokan.

Gi dugang usab sa tigpamaba sa PNP nga si Senior Superintendent Agrimero Cruz, Jr. nga wala pa hinuon sila nakadawat og tahu nga ang mga Abu Sayyaf adunay planong mo atake sa Luzon ug Visayas.

Gipasabot ni Cruz nga ang pagpasaka sa alert level parte lamang sa ilang security measures.

Gipasalig hinuon ni Cruz nga ang PNP magpabiling magbantay sa mga panghitabo ilabi na ang niaging encounter sa Mindanao. (PIA-Bohol)

Submit a Comment