Kapulisan nihangyo sa pagsabot sa publiko

MIHANGYO ang Bohol Provincial Police Office ug pagsabot sa publiko sa padayon nilang gihimong check points sa mga kadalanan sa probinsya.

Si PSupt. Antonieto Cuyos nipadayag sa maong hangyo atol sa usa ka information sharing sa unang tigum alang sa tuig 2011 sa Association of United Development Information Officers sa Bohol (AUDIO).

Gihangyo usab ni Cuyos ang tabang sa mga information officers sa mga kalungsuran ug mga ahensya sa kagamhanan nga tabangan usab sila sa pagpasabot ngadto sa katawhan ilabi na gayod niining panahuna nga adunay hulga sa kalinaw sa gikataho’ng paghidangnat sa mga sakop sa Abu Sayyaf dinhi sa probinsiya sa Bohol.

Ang buhatan sa BPPO-PNP gi-ulan og daghang reklamo ning mga milabay’ng adlaw sa mga motorista tungod sa gihimo niining mga check point sa mga kadalanan.

Gipasabot ni Cuyos nga ang gihimong mga check points sa kapilisan usa ka pamaagi nga ma-proteksyunan ang mga katawhan batok sa mga dautang elemento sa katilingban ug malikayan ang mga dili angayan nga mga panghitabo. (ecbPIABohol)

Submit a Comment