Kampanya sa trade liberalization, gipalig-on sa APEC

TAGBILARAN CITY, Bohol, Nov. 14 (PIA)–Nagkauyon ang 21 ka APEC leaders nga iduso ang gitawag nga trade liberalization aron makabangon gikan sa nahimong epekto sa global recession niadtong tuig 2008-2009.

Kini usa lamang sa nahimong bunga sa joint declaration nga gipagawas human ang tulo ka adlaw nga Asia-Pacific Ecomic (APEC) Leaders’ Summit sa Honolulu, Hawaii.

Nahisulod sa deklarasyon nga tukma sa panahon ang maong meeting taliwala sa financial crisis diin pila ka nasud ang nalubong karon sa utang ug daghang trabaho ang nangawala.

Base sa dokumento nga gilagdaan nilang Presidente Benigno “Noynoy” Aquino III, angay nga seryosohon na ang paghisgot sa gitawag nga Doha Development Agenda (DDA) nga dugay nang nag-ungot.

Ang DDA magpabilin lamang nga damgo kun sama sa niagi, hangtud negosasyon lamang ug wala’y kongkretong lakang nga gihimo sama sa paghatag og dalan sa mas gawasnong pagpatigayon.

Kalabot niini, gipalig-on pagbalik sa APEC leaders ang ilang commitment batok sa protectionism ug gi-aghat ang World Trade Organization nga mahimong katambayayong sa pagkab-ot sa DDA.

Ang protectionism dugay nang suliran sa regional trade tungod kay dili makasulod ang ilang investment sa mga nasud nga nagpatuman sa hugot nga regulasyon sa pagpatigayon. (PIA- Bohol/ecb)

Submit a Comment