Island Express suspendido human masunog ang usa nila ka barko

TAGBILARAN CITY, Aug. 23 (PIA)–  KASAMTANGAN’G gipa-kanselar sa Department of Transportation and Communications (DOTC) ang permit aron maka-byahe ang tanang barko sa Island Express Shipping human masunog ang usa nila ka barko nga niresulta sa pagkamatay sa tulo ka tawo niadtong Domingo.

Dungan niini, gitahasan ni DOTC Secretary Mar Roxas ang Board of Marine Inquiry nga ipatawag ang opisyal sa maong shipping company aron makuhaan og pahayag kalabot sa maong insidente.

“At this point, public safety is our primordial concern. I will not allow shipping companies to take chances with the lives of the passengers. DOTC will ensure that whenever a passenger steps on a ship, he can be certain that ship will have passed all the stringent requirements for safety,” matud pa ni Sec. Roxas.

Partikular nga wala gipa-byahe ang usa ka fast craft ug upat pang RORO vessel sa maong kumpanya. Kini aron masiguro nga tanang sakyanang pangdagat sa maong kumpanya luwas sa paglayag.

Kahinumdoman nga gikan sa Cebu paingon sa Tubigon, Bohol ang M/V Island Fastcraft I sa dihang nasunog, mga lima ka milya ang gilay-on sa Habagatang-Sidlakan sa Lawis ledge, Cebu City nga niresulta sa pagkamatay sa tulo katawo.

Gi-ila ang mga biktimang pasahero nga sila Matea Infiesto, 62 ug Nicetas Cabrera, 73-anyos, parehong taga Clarin, Bohol ug ang Chief Mate sa barko nga si Avelardo Torrevillas Sr., 57- anyos. (PIA-Bohol/ecb)

Submit a Comment