Hunyo 4, sugod sa klase sa school year 2012-2013

TAGBILARAN CITY, Bohol, May 03 (PIA)–Sa Hunyo 4, 2012 ang sugod sa klase sa mga estudyante sa mga pampublikong elementarya ug high school alang sa school year 2012-2013.

Sa gipagawas nga school calendar sa Department of Education (DepEd) alang sa school year 2012 hangtud 2013, magsugod ang klase sa Hunyo 4, 2012 ug matapos sa Marso 22, 2013.  Adunay kinatibuk-ang 200 ka mga adlaw sa klase.

Gi-aghat ni DepEd Secretary Armin Luistro ang mga pribadong eskwelahan nga modungan na usab sa pagsugod sa klase sa Hunyo 4 apan giingong mahimo ra usab silang magpalahi dili lang mas sayo sa Hunyo 4 o dili molapas sa katapusang adlaw sa Agosto.

Gibutyag usab sa kalihim nga naggahin sila og lima ka adlaw alang sa mga aktibidad sa mga magtutudlo ug mga ginikanan.

Apil sa highlights sa 2012-2013 school calendar ang Brigada Eskwela sa Mayo 21 hangtud 26 ug ang Oplan Balik Eskwela gikan Mayo 28 hangtud Hunyo 8.

Gitakda usab sa Hunyo 9 ang pagsugod sa orientation sa K to 12 sa mga ginikanan ug uban pang personalidad nga apil niini. (PIA-Bohol/ecb)

Submit a Comment