Adunay kapin sa 7,000 ka indibidwal ang nahimong biktima sa human rights violations niadtong rehimeng Marcos nga apil sa makadawat sa $7.5 milyon compensation fund.
Kini human nitabang ang Commission on Human Rights (CHR) nga mapadali ang pag verify sa mga claimants diin apil niini si CHR Chairperson Etta Rosales.
Matud pa ni Marie Cruz, media relations officer sa CHR nga bisan kauban si Rosales sa claimants, gibalibaran niini ang madawat nga parte sa giingong kantidad sa compensation fund ug i-donate na lamang niya kini sa usa ka foundation.
Matud pa, nakipag-tambayayong usab si Rosales kang Atty Robert Swift, lead counsel sa gidusong class suit aron mahapsay ang proseso sa paghatag og salapi sa mga biktima sa pagpanglapas sa tawhanong katungod. Si Cruz niingon nga makadawat og $1,000 ang matag biktima o miyembro sa gipasakang class action suit batok kang kanhi Presidente Ferdinand Marcos. (ecbPIABohol)
