Bohol News Daily

Giingong anomalya sa pondo sa DOH susihon sa Senado

Tagbilaran City, May 11 (PIA) – Imbestigahan sa Senado ang giingong anomalya sa paggamit sa
pondo sa Department of Health (DOH) sa milabay nga administrasyon.

Kini ang gipahayag ni Senador Vicente Sotto III nga maoy nibutyag sa giingong iregularidad sa iyang
privilege speech sa Senado kagahapon.

Matud pa ni Sotto nga susihon sa mga Senador ang mahitungod sa P423 milyong gipagawas sa
DOH alang sa maternal and child health and nutrition program nga giingong wala nadawat sa ilang
beneficiary.

Gikuwestyon usab ni Sotto kun nganong kinahanglan pang mohimo og balaod alang sa reproductive
health nga aduna man unta’y P3 bilyong budget na ang DOH alang sa strategic plan on family
planning.

Samtang kampante si kanhi Health Secretary ug karon Civil Service Commission (CSC) Chairperson
Francisco Duque nga mapasabot ra ang giingong anomalya sa multi-milyong pisong pondo ng DOH
alang sa mga programang maayong panglawas sa mga local goverment unit (LGU) sa panahon sa
iyang pagdumala.

Sa pakighinabi sa radyo, niingon si Duque nga report lamang sa Commission on Audit (COA) ang
kaatbang niini aron makita kun giunsa paggasto ang pondo sa DOH ubos sa iyang pagdumala.

Giingong nakaseguro siya’ng adunay na-audit ang COA alang sa tuig 2008 hangtud 2010 bisan sa
records of disbursement sa regional DOH nga maoy nagpagawas sa pondo sa mga LGU.

Unang gibutyag ni Sotto sa iyang privilege speech kagahapon nga miabot sa P423 milyon ang
gipagawas nga pondo sa DOH alang sa usa ka programa apan giingong wala kini nadawat sa mga
beneficiary. (PIA-Bohol/ecb)