Emosyonal nga paghandom sa ‘hostage incident’

TAGBILARAN CITY, Aug. 23 (PIA)– MIPAHIGAYON og usa ka Buddhist ceremony ang mga paryente sa Manila hostage victims ug survivor sa mismong nahitaboan sa insidente atubangan sa Quirino Grandstand, Luneta, Manila.

Apil sa mga mitambong sa ritwal silang Lee Ying Chuen, survivor; James To Kun Sun, legislative councilor; Tse Chi Kin, Tse Chi Hang, igsuon sa tour guide nga si Masa Tse; Lee Mei-Chun, inahan ni Masa; Man Ho Ching, abogado sa mga biktima ug ang mga Budhist monks
nga nakabase sa Pilipinas.

Sa maong programa, mihalad sila og mga buwak, pagkaon ug ilimnon. Nagtuo man gud ang mga mihalad nga manginahanglan ang mga namatay og pagkaon alang sa ilang pagtaliwan sa laing kinabuhi.

Miabot usab sa Rizal Park si Tourism Sec. Alberto Lim ug uban pang opisyal sa DoT.

Sa Camp Crame, gipasigarbo usab sa Philippine National Police (PNP) ang nahimong rebisyon ug pagbag-ong nahimo sa ilang pundok human sa dugo-ong Agosto 23 nga hostage crisis.

Matud pa ni PNP chief Gen. Raul Bacalzo, nahimo na sa gobyerno ang ilang katungdanan ilabi na sa mga pulis nga angay makasuhan nga nagresulta sa pagkamatay sa walo ka Hong Kong tourists mao nga giingong dili tinuod ang mga gibuhiang pahayag sa mga paryente sa mga biktima.

Gipahayag ni Bacalzo nga apil sa nahimong rebisyon sa PNP ang critical incident policies partikular na ang pagpagawas sa hostage negotiation handbook sa hostage negotiator, pag- usab sa 1996 manual on crisis management, pagpa-ubos sa refresher course sa PNP SWAT team ug ang pagmugna og PNP Crisis Action Force (CAF), interim elite unit nga gilangkoban sa 11 ka opisyal ug 143 ka non-officers gikan sa SAF, aviation security group ug maritime group alang sa epektibong paggunit sa hostage crisis.

Mihalad usab og misa sa Camp Crame alang sa mga biktima sa insidente nga gipangunahan ni Bishop Leopoldo Tumulak nga gitambongan sa mga dagkung opisyal sama nilang DILG Sec. Jesse Robredo, Gen. Bacalzo ug Mr. Tan Ching, ang presidente sa Philippine Chinese Federations. (PIA-Bohol/ecb)

Submit a Comment