DTI miseguro nga gipaningkamotan sa gobyerno nga mapadali ang pagnegosyo sa nasud

TAGBILARAN CITY, Bohol, Nov. 10 (PIA)–Giseguro ni Trade and Industry Secretary Gregory Domingo nga gipaningkamotan sa gobyerno nga mapadali ang pagnegosyo sa Pilipinas.

Atubangan kini sa gihimong pagtuon sa World Bank nga gi-ulohan og “Ease Of Doing Business” diin migawas nga naa sa ika-upat ang Pilipinas sa “World’s Top Ten Worst Countries for Business”.

Matud pa ni Domingo nga apil na niini ang pagpahiluna sa business permit licensing system sa pakigtambayayong sa Department of Interior and Local Government (DILG) og mga local government unit (LGU) aron mas paspas ang pagproseso sa mga business permit.

Naa na usab ang ipatuman nilang Philippine Business Registry diin makuha na sa negosyante ang ilang business name, TIN, Social Security System (SSS), PAG-IBIG, ug PhilHealth registration sulod lamang sa 30 minutos.

Dugang pa ni Domingo, nagkaproblema lamang sila sa koneksyon sa Securities and Exchange Commission (SEC) tungod kay dili pa sila fully computerized o automated. (PIA- Bohol/ecb)

Submit a Comment