TAGBILARAN CITY, October 5 (PIA)–Sugdan na sa Department of Trade and Industry (DTI) sa Bohol ang pag-monitor sa mga nag-unang panaliton sa panahon sa Kapaskohan ilabi na ang mga produktong pang noche buena tungod kay nagsugod na og dagsang sa mga dagkong tindahan ang mga mamamalit isip preparasyon sa panahon sa Pasko.
Matud pa ni Jose Hibaya, Provincial Chief sa DTI Consumer Welfare and Business Regulations Division, ang mga kawani sa ilang departamento magsugod na og pahigayon og monitoring operations sa mga kamerkadohan ug mga dagkong tindahan dinhi sa lalawigan sa Bohol.
Dugang pa ni Hibaya, magpadayon ang ilang monitoring taman Disyembre diin kasagarang ipahigayon ang mga Christmas parties.
Apan giseguro ni Hibaya nga sa pagkakaron, walay angay ikabalaka ang mga konsumidor tungod kay wala pa ma’y pagsaka sa mga presyo sa nag-unang panaliton ang ilang nabantayan.
Niadtong Setyembre, ang DTI nipatuman og prize freeze order human sa pagdeklarar og state of national emergency tungod sa state of lawlessness ni Presidente Rodrigo Duterte.
Pinaagi sa maong prize freeze order, mapanalipdan ang mga konsumidor gikan sa abusadong negosyante nga magpasulabi og pasaka sa presyo sa ilang mga baligyang produkto.
Sa niaging tuig, daghang reklamo gikan sa mga konsumidor batok sa mga retailers nga nagpasulabi sa presyo sa mga produktong pang-noche Buena. (ecb/PIA7-Bohol)
