SUBLI nga gipasabot sa Department of Public Works and Highways (DPWH) ang ka-importante sa pasilidad sa drainage alang sa kadalanan aron dili kini dali nga mangaguba.
Kini usab samtang gisabutan na usab sa mga opisyal sa Bohol ug Tagbilaran ang solbad sa suliran nga makadaut hinuon sa bag-ong gisementong Carlos P. Garcia Avenue sa syudad.
Kasamtangang nag-antos sa pagbaha ug paglunop ang mga moagi ug namuyo sa CPG North bisan pag may tukmang drainage na nga napahimutang dinhi.
Ang lunop dala sa dili makagawas ang tubig binanlas sa uwan kay sirado pa ang gawasanan nga kanal niini. Sirado pa usab ang kanal awasanan niini kay wala itugot nga ihagbong lakip sa uwan ang hugaw nga gipa-agas sa kanal.
Gihimo na nga palisiya ni DPWH Sec. Hermogenes Ebdane ang pagpahimutang ug apil sa kanal sa foreign-assisted road projects. Gusto niya nga may tukmang line canals ug cross drains subay sa himoong mga nasudnong dalan sa nasud.
Ang kanal magtabang pagpahubas sa tubig aron dili makapahumok sa dalan hangyud kini dali madaut. (rachiu/PIA)
