DOH, nipahinumdom sa publiko sa mga sakit nga makuha sa ting-init

 

 

TAGBILARAN CITY, Abril 11 (PIA)–Gipahinumdoman sa Department of Health (DOH) ang publiko batok sa mga sakit nga kasagarang makuha matag panahon sa ting-init, human pormal nang gi-deklarar sa Philippine Atmospheric, Geophysical and Astronomical Services Administration (PAGASA) ang panahon sa ting-init sa nasod.

 

Sa abiso sa DOH, miingon kini nga usa sa mga sakit nga angay likayan karon nga inanay nga pag-init sa panahon mao ang heat stroke nga mahimong makamatay.

Aron malikayan ang heat stroke, giingong likayan ang pagbuwad sa init gikan alas 10:00 sa buntag hangdtod alas 3:00 sa hapon.

Apan kun dili malikayan ang paggawas sa balay, giingong mas makaayo nga mogamit og ‘protective gears’ sama sa payong ug kalo ug batasanon usab ang pagdala ug pag-inom og daghang tubig aron malikayan ang dehydration nga mahimong maule sa heat stroke.

Gawas sa heat stroke, angay usab nga molikay sa sore eyes o piskat nga dala sa bakterya o virus nga daling makatakod kun ang mata mapahiran og kamot o gamit nga may bakterya o virus.

Pasidaan pa sa DOH, kun pasagdan ang sore eyes o piskat, mahimo kining maule sa pagkabuta.

Aron malikayan kining sakit, angay batasanon ang kanunay nga paghugas sa kamot ug gitambagan ang publiko nga magpakonsulta una sa doktor sa dili pa mogamit og mga eye drops.

Dali ra usab magka-sunburn kun panahon sa ting-init mao nga dili angay nga magbuwad sa init kun kanus-a taas ang lebel sa makadaot nga UVA ug UVB rays.

Mahimong mogamit og sunblock nga dili mo-ubos sa SPF-30, 30 minutos sa dili pa mogawas ug magbutang na usab og sunblock human sa duha  ka oras ug dili kalimtang pahiran ang dalunggan, tangkugo ug tiil.

Dali ra usab makuha ang sip-on ug ubo matag panahon sa ting-init tungod sa init ug pabag-o bag-ong panahon.

Gitambagan usab ang publiko nga susihon ang mga kaonon ug imnon tungod kay ang pagkaon ug ilimnon nga kontaminado maoy hinungdan sa pagkalibanga ug pagsuka.

Matud pa nga angay mag-andam og magbalon og Oral Rehydration Solution (ORS) aron imnon kun magkalibanga. Batasanon usab nga moadto sa pinakaduol nga Health Centers aron mokunsulta ug malikayan ang ‘severe dehydration’.

Ang sakit sa panit sama sa boils o pigsa kasagarang makuha sa mga lugar diin may kakulang sa tubig, huot nga lugar ug dili regular nga maligo ang mga tawo sama sa mga prisohan.

Mahimo usab makuha ang mga sakit sa panit sa mga ligoanan o swimming pools nga hugaw mao nga batasanon unang maghunawnaw sa dili pa og human maligo sa mga swimming pools.

Samtang gitambagan sa DOH ang publiko nga kun mapaakan og iro, hugasan dayon ug sabonan ang samad ug moadto sa mga animal bite centers aron mahatagan og bakuna batok sa rabies. (ecb/PIA7-Bohol).

Submit a Comment