DOH, gitun-an ang total ban sa mga paboto

TAGBILARAN CITY, Bohol, Dec. 27 (PIA)–Gitun-an sa Department of Health (DOH) ang pagduso sa total ban sa paggamit sa mga paboto bisan mikunhod kini og 33 porsiyento karong tuig kun itandi sa niaging tuig.

Matud pa ni Health Secretary Enrique Ona, gikonsiderar sa DOH ang pag-ban sa individual use sa mga fireworks/firecrackers ug iduso nila ang pagbaton na lamang og community display sa mga fireworks aron padayong makuhaan ang gidaghanon sa mga biktima sa paboto.

Migawas nga gikan Disyembre 21-26, mikabat sa 72 fireworks-related injuries ang natala diin 71 niini tungod sa paboto samtang usa usab ang tungod sa stray bullet. Walay natala nga namatay samtang sa niaging tuig, mikabat sa 108 fireworks-related injuries ang natala diin 99 ang gikan sa paboto, 8 sa stray bullets ug usa sa aksidenteng pagkatulon sa paboto.

Kadaghanan sa mga kasong natala gikan sa National Capital Region (20), Western Viasayas (12), ug Cagayan Valley (6) samtang nakatala usab og tig-lima ka kaso ang CALABARZON, Central Visayas, ug Zamboanga Peninsula.

Kadaghanan sa mga biktima o 86% mga lalaki ug gikan siyam ka buwan ang panuigon hangtud 58-anyos.

Majority usab o 73% sa mga biktima nagbaton og blast injuries nga wala na nanginahanglan og amputation o wala naputli og parte sa lawas, 20% (14) ang naigo sa mata ug 4% (3) ang nabuthan nga may amputation o naputlan og parte sa lawas. (PIA-Bohol/ecb/I-gg)

Submit a Comment