DOE andam makipagsabot-sabot sa Consumer ug Oil Price Watch kalabot sa oil price adjustments

ANDAM ang Department of Energy (DOE) nga makipagsabot-sabot sa grupong Consumer
ug Oil Price Watch (COPW) ni Raul Concepcion kalabot sa computation sa gipatuman nga
price adjustment sa mga produktong petrolyo.

Sa usa ka pakighinabi sa radyo, gipahayag ni Energy Secretary Jose Rene Almendras
nga mahimong moapil sa weekly meeting sa DOE kada Lunes sa buntag ang grupo ni
Concepcion aron makita niini ang formula ug computation sa gipatuman nga price adjustment
sa mga kumpanya sa lana.

Giingong andam usab silang makipagsabot-sabot sa grupo ni Concepcion aron mahibaw-an
ang kaugalingong computation niini ug uban pang impormasyon nga mahimo nilang ipaambit
nga makatabang sa gobyerno.

Kalabot usab sa suhestiyon ni Senador Ralph Recto sa paggamit sa inventory-based pricing
sa computation sa price adjustment, gitataw ni Almendras nga wala siya nisulti nga dili kini
angay gamiton.

Adunay tukmang panahon lang matud pa sa paggamit niini ug sa karon, ang spot-based
pricing ang gigamit sa gobyerno.

Niangkon usab ang kalihim nga nag-unang hagit sa DOE ang supply security diin
kinahanglang mas padak-an pa ang kasamtangang suplay sa produktong petrolyo sa
Pilipinas tungod na usab sa kagubot sa pipila ka nasud sa Middle East. (ecbPIABohol)

Submit a Comment