Diwa sa EDSA People Power Revolution magsilbing gabayan sa gitinguhang paglambo ug kahusay sa lalawigang Bol-anon

Tagbilaran City, Bohol – ANG diwa sa EDSA maoy magsilbi nga gabayan alang sa pagtubag
sa mga nag-unang mga problema sa lalawigan sa Bohol sa pagpa-ngalagad sa gobyerno.

Kini maoy giluwatang pamahayag ni Gobernador Edgar Chatto atol sa gibuksang programa
kaganinang buntag agig pagpahaum sa paghandom sa ika-25 ka tuig nga EDSA People
Power Revolution sa nasud.

Matud pa sa Gobernador nga ang pagtubag nga walay dugo nga gibanaw ingon man usab
ang uban pang mga problema nga giatubang sa nasud sa malinawon nga paagi sama sa
EDSA People Power Revolution mao ang gabayan sa pagpangalagad sa gobyerno aron
motonhay ang lalawigan sa Bohol.

Sumala pa ni Chatto nga daghan pa og mga kausbanan ang angay pang kab-uton og
magamit ang diwa sa EDSA aron atong maabot ang atong mga damgo.

Dugang pa sa Gobernador nga ang diwa sa EDSA sa panaghiusa sa katawhan angayan
lamang kanunay pagahinumdoman sa mga Bol-anon ug mga Pilipinhon kay walay dili nato
mausab kun ang tanang katawhan aduna gayud pagpalabi sa katumanan sa atong mga
damgo.

Angay adunay panaghiusa sa katawhan ug angay aduna usab panaghiusa sa kusog aron
makahatag og nindot nga katumanan sa tinud-anay nga kausbanan.

Nanawagan si Chatto sa tanang Bol-anon, pinangunahan sa mga nag-alagad sa gobyerno
nga mag-una sa paggiya, paghulma ug pag-aghat sa mga katawhan paingon sa usa ka
tingog ug direksiyon gamit ang diwa sa People Power Revolution sa pagbatok sa kakabus.
(ecbPIABohol)

Submit a Comment