DepEd mopatuman sa K+12 program sa tuig 2012-2013

Niadtong adlaw sa World Teachers’ Day, Oktubre 5, gi presenta ni Education Secretary Bro. Armin Luistro ang 12 ka tuig nga “Enhanced Kindergarten-Grade 12 (K+12)” basic education program nga planong ipatuman sa kagamhanan sa school year 2012-2013.

Sa pagpatuman sa maong programa, kinahanglang lihokon sa Department of Education (DepEd) sa Kongreso ang pag-usab sa naandang balaod nga Batas Pambansa 232 o ang “Education Act of 1982,” nga nagsaysay nga 10-year program ang basic formal education.

Sa pag-usab sa maong balaod ug pagpatuman sa 12 ka tuig nga basic education program, kinahanglang mohimo og konsultasyon ang DepEd hangtud sa unang kwarter sa sunod tuig.

Matud pa ni Luistro nga human sa konsultasyon, ang balaod pwedeng ipapasar sa tuig 2013, sa dili pa ang sunod nga eleksyon.

Dugang pa ni Luistro nga ang DepEd mohimo gyud og maisug nga lakang sa pagpa-usbaw sa basic education curriculum. Ang K+12 nga programa mosangkap sa 12 ka tuig nga di-kalidad nga edukasyon nga maghatag katungod sa matag Pilipino.

Ang K+12 model nagtino sa usa ka tuig nga kindergarten ug 12 ka tuig nga basic education.
Ang bag-ong programa magdugang og duha ka tuig sa kasamtangang education model sa Pilipinas, ang nag-inusarang nasud sa Asya nga nagpatuman og 10 ka tuig nga basic education program. (PIA-Bohol)

Submit a Comment