by boholbalita | Oct 4, 2010 | Headlines, Local News / Bohol Balita
SI Police Inspector Noel Colipano Abalde, kasamtangang hepe sa Panglao Police Station sa lungsod sa Panglao kinsa maoy nangulo sa pagkasikop sa unom ka gidudahang tulisan didto sa lungsod sa Loon maoy napiling most outstanding chief of police sa probinsiya sa Bohol.
Nasayran sa Bohol Balita nga si Abalde maoy gi-nominate sa Administration Division sa Bohol Provincial Police Office ubos ni Supt. Jeffrey Caballes nga maoy mopresentar sa Bohol PNP alang sa Second Lead PNP Awards sa Rehiyon 7.
Si Abalde, 27-anyos natawo sa dakbayan sa Toledo, probinsiya sa Sugbu ug nigraduwar sa Philippine National Police Academy niadtong 2007.
Sukad niadtong 2008 nisilbi siya isip hepe sa tulo ka police station sa lungsod sa Getafe, Balilihan ug Panglao.
Sa pagdestino niya sa Getafe, atol sa iyang paglingkod, nakasulbad siya og usa ka kaso sa pagpatay sa wa pa moabot ang 24 oras gikan sa pagkahitabo sa krimen diin ilang nadakpan ang suspetsado didto sa barangay Cabasakan.
Lakip nga iyang nasikop mao ang kaso sa sexual abuse, kawat, ilegal nga druga, illegal possession of firearm, illegal fishing, illegal cutting of trees ug uban pa.
Gipatuman usab niya ang “No Plate, No Travel Policy diin nakasikop sila og daghang mga sakyanan nga walay plaka ug gi-impound sa police station.
Dihang nadestino siya didto sa lungsod sa Balilihan, nakasulbad usab siya sa kasong homicide gumikan sa rekless imprudence, mga kasong robbery ug pagkaugkat sa patay’ng lawas sa usa ka bata nga na-missing sa usa ka suba sa utlanan sa Balilihan ug Antequera.
Lakip nga iyang nahimo mao ang pagkasikop sa mga tawo nakahimo og salaud sa illegal fishing ug illegal logging ug pagakasakmit sa pito ka botelya nga may sud nga explosibo.
Sa iyang pagkadestino sa lungsod sa Panglao, aktibong nisalmot si Abalde sa kalihukan sa komunidad pinaagi sa aktibong police visibility sa maong dapit. Lakip niini mao ang SCUBAsurero, Coastal Clean-Up. Nakig-tie-up siya sa mga German nationals ug ubang mga langyaw nga nagpuyo sa lungsod diin ang tuyo niini mao ang pagpanalipod sa kalikupan sa dagat.
Aktibong lecturer ug organizer usab si Abalde sa mga pagbansay-bansay sa barangay tanod sama sa Barangay Tanod Skills and Enhancement Seminar diin maoy hinungdan sa pagkaugmad sa Barangay Peace Action Team didto sa Getafe ug Balilihan.
Gumikan niini, nakahimo si Abalde sa pag-pioneer sa aktibong partisipasyon sa Barangay Tanod sa Bohol kalabot sa public safety.
Nakahimo usab si Abalde sa pagsulbad sa pagtulis ug pagpatay sa usa ka Italyanong nasyunal sa Panglao diin nadakpan ang responsable niini.
Apan ang pinakadakong nahimo ni Abalde dihang siya ang nangulo sa pagkasikop sa unom ka gidudahang mga tulisan kinsa maoy responsable sa sunod-sunod nga tulis sa probinsiya sa Bohol niadtong Agosto 26, 2010 didto sa barangay Catagbacan Sur, Loon, Bohol.
Si Abalde kansang motto sa iyang pagtapos sa academy nga nag-ingon ” I will fight and depend my country for God’s glory nag-ingon nga kini mao lamang ang sinugdanan sa iyang karera isip usa ka opisyal sa pulis. (Andy Nalzaro)
by boholbalita | Oct 4, 2010 | Headlines, Local News / Bohol Balita
Ligid sa 10-wheeler delivery trak natangtang ug nibangga sa motorsiklo sa biktima
NAANGOL ang kanhi hepe sa Land Transportation Office kun LTO-Tagbilaran human ang gimanehoan nga motorsiklo aksidenteng nabanggaan og usa ka ligid nga natangtang gikan sa 10-wheeler delivery truck didto sa barangay Taongon Cabatuan, Dimiao, Bohol niadtong Huwebes sa buntag.
Ang biktima nga si Leonardo Olaivar, 54-anyos, minyo, taga-barangay Guinsularan, Duero, Bohol nakaangkon og mga angol sa ulo ug walang siko ug gidala didto sa Dimiao Municipal Infirmary ug gibalhin sa usa ka tambalanan sa dakbayan sa Tagbilaran.
Sa pakisusi sa kapulisan nasayran nga samtang ang usa ka 10-wheeler delivery truck nga Isuzu wingban nga gipanag-iyahan sa Shopper’s Mart ug gimanehoan ni Camilo Nguho, taga-Tambuan, Carmen, Bohol nagdagan sa nasudnong dalan paingon sa direksiyon didto sa lungsod sa Guindulman pasado alas 10 sa buntag dihang pag-abot sa maong dapit, aksidenteng natangtang ang rear-right outer wheel niini ug niadtong higayona maoy pag-agi sa biktima nga nagmaneho sa iyang Kawasaki Fury kolor puti nga motorsiklo nga may plaka 424-GM paingon sa siyudad.
Matud sa taho nga ang ligid nibabag sa tunga ug nibangga sa gisakyan ni Olaivar hinungdan sa pagkatumba ug pagkahulog niini sa karsada.
Nisurender ang nakabangga didto sa Dimiao Police Station human sa hitabo. (Andy Nalzaro)
by boholbalita | Oct 4, 2010 | Headlines, Local News / Bohol Balita
NAMATAY ang usa ka ulitawo samtang nipahuway sa usa ka lingkoranan sud sa Intergrated Bus Terminal sa Dao-Dampas, dakbayan sa Tagbilaran niadtong Huwebes sa hapon.
Biktima nailhan nga si Julito Acampado, 30, taga-barangay West Poblacion, Garcia-Hernandez, Bohol.
Nasayran sa taho nga ang biktima ninaug sa iyang gisakyan nga Dory Bus Line mga alas 10:30 sa buntag ug nilingkod sa usa ka bangko sa maong dapit.
Matud sa taho nga nasigpatan ang biktima nga wala na magginhawa mga 1:30 sa hapon hinungdan nga gitabang ug gidala didto sa Gov. Celestino Gallares Memorial Regional Hospital sa siyudad apan gideklara kining patay na sa mga mananambal.
Sigun sa gihimong post-mortem nga esksamin ni Dr. April Lumothang sa City Health Office nga myorcardial infraction kun atake sa sakit sa kasingkasing ang hinungdan sa kamatayon sa naasoy nga biktima ug walay nagpaluyo nga tinunto niini. (Andy Nalzaro)
by boholbalita | Oct 4, 2010 | Headlines, Local News / Bohol Balita
KOLEKTOR sa usa ka kompaniya sa lending gitulis sa wala mailhing armadong lalaki samtang usa ka tindera og isda gi-hold-ap sa duha ka nakamotorsiklong lalaki sa managlahing insidente sa barangay Tiptip ug dalan Espuelas, dakbayan sa Tagbilaran niadtong Huwebes.
Unang biktima nailhan nga si Jet Marlon Bacareza, 23, minyo, lumad sa barangay Dipatlong, Maribojoc, Bohol.
Sigun nsa biktima nga samtang siya nagmaneho sa iyang asul nga Aura nga motorsiklo nga may plaka 9933 GA paingon sa direksiyon sa barangay Ubujan gikan sa barangay Tiptip mga 1:30 sa hapon dihang kalit lamang kining gibabagan sa usa ka wala mailhing lalaki ug gitionan og usa ka kalibre .45 nga pistola hinungdan nga na-crash kini sa karsada.
Pagkatumba sa sakyanan sa biktima, giduol kini sa suspetsado ug gipangayo ang iyang salapi ug gumikan sa kahadlok, iyang gitunol ang salapi nga mobalor og 5,600.
Dugang sa taho nga gimanduan ang maong biktima sa suspek nga molakaw dayong sutoy sa naulahi paingon sa Tiptip road.
Sa laing bahin, gitulis ang usa ka tindera og isda sa duha ka wala mailhing lalaki nga nagmotorsiklo samtang nagbaktas sa dalan Espuelas sa siyudad mga alas 7 sa gabii.
Biktima nagpaila nga si Carmen Comendador, 44, minyo, taga-Katipunan, Mansasa sa dakbayan.
Sigun sa taho nga usa sa mga suspek nga nagsaka sa usa ka pula nga Honda Wave
nga way plaka nibab ag sa dalan ug gitionan ang maong ginang.
Gumikan sa iyang kahadlok, gitunol sa biktima ang iyang salapi nga mokabat ngadto sa P6,000.
Nisibat ang mga gikatahapan paingon sa dalan Hontanosas. (Andy Nalzaro)
by boholbalita | Oct 4, 2010 | Headlines, Local News / Bohol Balita
GISUSI sa kapulisan sa lungsod sa Lila kun kinsa ang responsable sa paglabay sa 400 kilos nga inihaw nga manok nga nagsugod na og kadugta diin nadiskobrehan nga gilabay sa usa ka quarry area didto sa Sitio San Antonio, Poblacion, Lila, Bohol niadtong nakalabay nga adlaw.
Sigun sa taho nga ang kapulisan sa Lila ubos ni Inspector John Gelbert Basalo nihimo og aksiyon human nagpatabang ang usa ka Joseph Cloma, casual nga empleyado
sa LGU-Lila kabahin sa insidente.
Matud sa taho nga giorderan si Basalo ni Allan Cahiles, municipal administrator sa Lila nga pagasusihon ang maong taho.
Atol sa gihimong pakisusi sa usa ka tim sa Lila Police Station mga alas 8 sa buntag niadtong Huwebes, napalgan ang linabay nga mga manok sa maong quarry area nga nagsugod na og kadugta.
Nakit-an usab sa maong tim nga dunay pula nga label ang mga manok nga may marka nga “GM”, “Gama Foods, Misamis Oriental”.
Gikuhaan og tulo ka specimen ang linabay nga manok ug gisud sa usa ka botelya isip ebidensiya samtang si Dr. Deo Madelon Blanes, municipal health officer nimandu nga ilubong ang mga linabay nga manok alang sa sanistasyon sa maong lugar. (Andy Nalzaro)
