Balay gidauban didto sa Getafe

BALAY naugdaw human gidabdaban sa wala mailhing suspetsado gamit ang gasolina didto sa barangay Campao Occidental, Getafe, Bohol niadtong nakalabay nga gabii.

Giila ang biktima nga si Dionisio Quizon, 35, minyo ug nagpuyo sa maong dapit.

Nasayran sa taho nga samtang nagbaktas ang biktima padung sa iyang gipuy-an mga alas 8 sa gabii niadtong Biyernes dihang nasigpatan niya ang ilang balay gikan sa gilay-on nga bahin nga nagdilaab ug dihang iyang gisusi, nahurot na og kaugdaw ang iyang pinuy-anan.

Gibana-banaang mokabat ngadto sa P40,000 lakip na ang personal nga mga gamit ang kinatibuk-ang danyos sa maong insidente apan walay gikatahong naangol niini.

Nakuha sa dapit nga nahitaboan mao ang usa ka basiyong plastic container nga gituohang gisudlan og gasolina ug maoy gigamit sa wala mailhing suspek.

Padayon pang gisusi sa kapulisan sa naasoy nga lungsod kun unsay motibo sa maong hitabo.

22 ka mga lungsod sa Bohol gideklarar nga walay illegal suertres

MOKABAT ngadto sa 22 ka mga lungsod sa probinsiya sa Bohol ang gideklarar sa kapulisan nga wala nay operasyon sa illegal nga suertres.

Si Bohol Provincial Police Director. Senior Supt. Constantino Barot Jr. nibutyag sa mga sakop sa Bohol Tri-media sa Talakayan sa Isyong Pulis kagahapon.

Ang mga lungsod naglakip sa Alburqueque, Alicia, Balilihan, Batuan, Bien Unido, Buenavista, Calape, Clarin, Corella, Cortes, Dagohoy, Danao, Duero, Garcia-Hernandez, Jagna, Loay, Loboc, San Isidro, Sevilla, Sikatuna, Trinidad ug Valencia.

Matud ni Barot nga ang hepe sa maong mga lungsod maoy nisumiter sa ilang mga report nga nahunong na ang operasyon sa maong ilegal nga sugal sukad gipatuman ang one strike policy sa PNP.

Apan dunay mga taho nga sa pipila ka mga lungsod nga nalakip nga dunay operasyon sa ilegal nga suertres apan patagu na kini.

Nipasalig si Barot nga iyang ipasusi sa intelligence branch kun unsa katinuod nga naundang na ang operasyon sa ilegal nga suertres sa naasoy nga mga lungsod ug ipadayon gihapon nila ang paggukod sa mga kolektor ug koordinator.

Mag-uuma giluba hapit mapatay

GRABENG hingsamdan ug hapit mapatay ang usa ka mag-uuma human gidunggab sa iyang silingan didto sa barangay Katipunan, Alicia. Bohol niadtong milabay nga gabii.

Ang biktima nga si Apolinario Payapanim, 51, minyo, nagpuyo sa maong lugar naigo sa tuong bahin sa iyang dughan ug gidala didto sa Gov. Celestino Gallares Memorial Hospital sa dakbayan sa Tagbilaran.

Suspetsado nailhan nga si Jaime Bersano, hingkod ang panuigon, ulitawo.

Nasayran sa taho nga nag-abot ang duruha sa ilang dapit mga alas 11 sa Miyerkulis sa gabii ug gihansakan ang biktima og usa ka kitchen knife.

Nisibat ang maong suspetsado ug padayon pang gipangita sa kapulisan sa maong lungsod.

Torregosa gitakdang pagakuhaon sa Sugbu

SI Alberto Torregosa ang suspetsadong tulisan nga usa sa mga suspek sa sunod-sunod nga tulis sa probinsiya sa Bohol gitakdang pagakuhaon didto sa dakbayan sa Sugbu kay nalutsan na kini og warrant of arrest sa iyang kaso sa dakbayan sa Tagbilaran.

Kini maoy gibutyag ni Bohol PNP director, Senior. Supt. Constantino Barot Jr. dihang nahinabi sa mga sakop sa media kagahapon.

Matud ni Barot nga maghulat una sila kun anus-a mapasakaan si Torregosa sa iyang salaud didto sa dakbayan sa Sugbu.

Nagkanayon si Barot nga kun mahuman na ang pagpasaka, mahimo nang pagakuhaon ang maong suspek.

Sayo niini, si Torregosa, 39, taga-Magtangtang, Danao, Cyril Ostea, 26, taga-Guiwanon. Baclayon ug usa ka John Nuez, 21, taga-San Miguel, Bohol nadakpan niadtong Lunes sa gabii didto sa dakbayan sa Sugbu human nanulis sa usa ka kompaniya lending firm sa barangay Sambag I.

Si Torregosa ug Ostea nasamdan human nakigpinusilay sa usa ka sakop sa pulis kinsa nirespondi sa maong krimen. Ang duha gitambalan didto sa Cebu City Medical Center.

Mga personahe sa Zest Air lines niangkon sa ilang sayop, nangayo og pasaylo sa SP

apan pasakaan gihapon og sumbong sa mga complainant

NIANGKON sa ilang kasaypanan ang mga personahe sa Zest Air Lines kinsa nakahatag og kadismaya sa duha ka bisita ni Bokal Freda Tirol human nakansela ang ilang flight niadtong Septiyembre 15 sa hapon.

Kini maoy gibutyag ni Tirol kinsa maoy chairman sa Committee on Tourism sa Sangguniang Panlalawigan dihang nahinabi sa Bohol Balita.

Matud ni Tirol nga si Menchie Mejorada, usa sa mga personahe sa maong airlines nga nadestino sa Tagbilaran City Airport nangayo og pasaylo atol sa inquiry sa committee on the whole sa Sangguniang Panlalawigan niadtong Miyerkulis.

Niingon si Tirol nga giangkon ni Mejorada nga wala gayud silay abyon nga gieskedyol sa maong petsa sukwahi sa ilang giestorya nga dunay aircraft maintenance maong nakansela ug wala nila napasabot ang mga complainant niini.

Nibutyag usab si Tirol nga nagkulang gayud ang Zest Air sa ilang pag-entertain sa ilang kustomer ug gumikan niini pasakaan gihapon sila og sumbong sa maong insidente.

Gawas kang Mejorada, nitambong usab si Genevieve Jamisola, operation manager sa Travel and Tours Agency nga maoy gipalitan sa airline ticket.

Nanghinaut siya nga dili na unta masubli ang maong insidente diin makadaut hinuon kini sa kaugmaran sa turismo sa probinsiya sa Bohol. (Andy Nalzaro)