WALA matarug si Presidente Benigno Simeon Aquino sa iyang baruganan nga hilibisan ang pahat alang sa mga tunghaan sa kagamhanan (state universities ug colleges) tungod kay matud niya, duna pa silay daghang kakuhaan ug kita aron ikapuno sa tabang sa kagamhanan.
Segun sa mga taho, ang budget alang sa edukasyon sa sunod tuig naa na sa P271.67 bilyobes o 12.92 % nga taas pa kay sa pagat sa edukasyon ning tuiga nga anaa ra sa P240 bilyones.
Niini, gipahat ang P23.4 bilyones alang sa SUC, o 11.3% nga mas dako pa sa P21 bilyones ning tuiga.
Butyag usab ni Presidente Aquino nga ang sugyot nga pahat sa University of the Philippines gilaslasan ngadto sa P5.5 bilyones gikan sa P6.9 bilyones ning tuiga dala sa pagtuo nga makasapi ang tunghaan sa matrikula ug uban pang bayranan.
Dugang ni Aquino, dili lamang magtutok ang kagamhanan sa college education tungod kay buot sa iyang administrasyon nga makahatag og batakang edukasyon alang sa tanan. (PIA)
